Dua kes pemati, siti kluster baru di Betong

KUCHING: Opis Pengerai Nengeri Sarawak (JKNS) ngenukuka siti kluster baru di Pelilih Betong nya Kluster Jalan Muhibbah.

Pia mega, Kluster Jalan Muhibbah nya kluster komuniti ba sebuah rumah di jalai Muhibbah nengah pengawa gempuru kediri kena 10 Februari tu tadi.

Indeks kes ngagai kluster nya kes ke-7,407 iya nya siku lelaki beumur 50 taun ditemu nengah pengawa beperesa orang ti bisi kelai kena 16 Februari tu tadi tang iya udah bisi kelai kena 14 Februari tu tadi.

Naka diatu, bisi 110 iku udah diperesa ke alai 18 kes udah ditemu positif Covid-19 nyengkaum indeks kes, 45 iku negatif enggau 47 iku agi nganti pemutus.

Betong udah bebali ngagai status oren pengudah ngerikod 22 kes berampit dalam menua ba timpuh 14 hari ke udah seraya Kluster Bah Sayap di Miri udah punas kemari pengudah nadai ngerikod kes baru dalam timpuh 28 hari ke udah.

Pelilih Meradong bebali ngagai status mirah pengudah ngerikod 67 kes berampit dalam menua ba timpuh 14 hari ke udah seraya Pelilih Kanowit bebali status oren pengudah ngerikod 37 kes berampit dalam menua.

Dua kes pemati dirikodka di Sibu ngujungka bisi 76 iku tauka 0.92 peratus ari kes positif diripotka ba Sarawak ke alai kes pemati ke-75 nya kes ke-5,850 ngaul siku lelaki peranak menua beumur 41 taun ti udah diperubat di Sibu.

Iya mega bisi kelai renga enggau tabin berapa hari ke udah sebedau diperubat enggau beperesa Covid-19 lalu ditemu positif Covid-19 kena 8 Februari tu tadi enggau bebadi nyawa kena 22 Februari tu tadi.

Kes pemati ke-76 nya kes ke-6,668 ngaul siku lelaki peranak menua beumur 74 taun ti dipasuk ngagai Sepital Sibu pengudah ditemu positif Covid-19 lalu iya bebadi nyawa kena 23 Februari tu tadi sereta penyakit Parkinson lalu bisi kaul enggau Kluster Geronggang.

Nambahka nya, Sarawak ngerikod 133 kes baru positif Covid-19 ke alai 36 kes di Meradong, 28 kes di Sibu, 17 kes di Betong, 13 kes di Samarahan, 12 kes di Kuching, lapan kes di Bintulu sereta bela enam kes di Julau enggau Subis.

Nangkan nya, tiga kes di Miri sereta bela siti kes di Saratok, Kanowit, Beluru enggau Dalat.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak