Lubok Antu enggau Telang Usan udah bebali ke status gadung

KUCHING: Pelilih Menua Lubok Antu enggau Telang Usan sehari tu udah bebali ke status gadung ari status kuning pengudah nadai ngerikodka sebarang kes baru kena rampit Covid-19 dalam timpuh 14 hari.

Komiti Penyangga Penusah Ngenyit Nengeri (JPBN) dalam penerang media kemari mega madahka Pelilih Menua Samarahan enggau Subis mega pulai bebali ngagai status kuning ari status oren pengudah semina ngerikodka 17 enggau 18 kes dalam kandang 14 hari ke udah.

Naka tu, Pelilih Menua Lundu, Beluru, Kapit, Song, Dalat, Bintulu, Kanowit, Miri enggau Sibu mengkang ba status mirah pengudah ngerikodka 1,927 kes berampit dalam menua.

Pelilih Menua Kuching, Selangau, Sri Aman, Matu enggau Bau mengkang ba status oren ke alai Pelilih Menua Betong, Saratok, Sarikei, Daro, Sebauh, Lawas, Bukit Mabong, Tatau, Pakan, Serian, Belaga, Meradong, Julau enggau Simunjan mengkang ba status kuning.

Tu ngujungka pelilih menua ba status gadung diatu nambah ngagai 10 buah.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak