Program meri vaksin di Saratok mujur

SARATOK:  Program meri vaksin ungkup renggat keterubah ditu mujur lalu bisi 88 iku bala ketuai opis perintah nyengkaum staf opis pengerai (KKM) pelilih menua ditu diberi basa nyadi orang keterubah dulu nerima tuchuk vaksin Covid 19 pagi kemari.

Direktor Sepital Saratok, Dr. Faizzudin Fauzi madahka pengawa meri vaksin nya dibagi ngagai tiga renggat, sehari tu diuluka Ketuai Balai Polis Saratok, Ketuai Opis Bomba Enggau Penyah Penusah Saratok, Ketuai Rela, Ketuai Kaunsil Pelilih,Ketuai Opis Pelilih,Ketuai Opis Pemadah enggau bala staf Sepital Saratok.

“Program meri vaksin baka ke pagi tu (kemari) diungkup ngagai ketuai opis perintah sereta staf KKM aja sebedau bala bukai,” ku iya maya dirandau Suara Sarawak pengudah tembu Program Vaksinasyen Covid 19 Bagi Pelilih Saratok ba Dewan Mensia Mayuh Sri Krian ditu pagi tadi.

Berebak enggau nya, Dr Faizzudin madah urung 4,000 iku pesakit kemi manis, darah tingi enggau ke bukai deka nerima vaksin nangkan ke tu.

“Mensia mayuh ke beumur 18 taun ke atas ke udah berejista betuchuk vaksin ba aplikasyen My Sejahtera deka belabuh dituchuk bulan April ila.

“Arapka mensia mayuh anang irau laban raban ari opis pengerai deka ngatur pejalai meri vaksin nuju genturung pendiau enggau rumah panjai.

“Diatu KKM udah ngelala palan alai betuchuk iya nya ba Kabong, Nanga Budu, Nanga Atoi enggau di Roban kelimpah di Dewan Sri Krian ba Pasar Saratok ditu.

“KKM Saratok disadang deka bekerejasama enggau Opis Pelilih Saratok ngatur program meri vaksin ba semua genturung pendiau enggau rumah panjai pengudah ngambi nama peranak ti deka betuchuk dikena nentuka nadai orang tinggal ari nerima vaksin tu,”ku iya.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak