10 hari ngasu ‘Bujang Batang Oya’

OYA: Operasyen ngasu, nangkap enggau munaska ‘Bujang Batang Oya’ (Baya Batang Oya) dipejalaika pengelama 10 hari lalu benung berengkah 12 March (Hari Lima) nyentuk 21 March tu.

Bisi 17 iku ngambi bagi ba pengawa ngasu baya tu diuluka raban Opis Kampung Sarawak (SFC), Polis DiRaja Malaysia (PDRM) enggau Komuniti Orang Berikan Sungai Oya sebagi ari kapten operasyen nya beduduk ari empat iku peranak menua nya udah bebadi nyawa kena tagup baya.

Ba penemu Kaban Kaunsil Pelilih Dalat enggau Mukah (MDDM) Kaunselor Arini Suhaili madah, PDRM enggau SFC diatu udah ngasuh raban orang berikan ngetu dulu nurun ke ai Batang Oya sekumbang pengawa ngasu tu.

“Tu dikena nyeliahka sida ngachau palan baya ke suah dipeda sereta umpan udah ditani ba endur ke bekaul.

“Raban ti ngambi bagi ba pengawa nya bemalam ba Dewan Komuniti Kampung Bakong Oya sekumbang operasyen nya,” ku iya madah ngagai Suara Sarawak kemari.

: NGASU BAYA BATANG OYA … Entara raban ke benung ngasu baya di Batang Oya. Pengawa tu dipejalai berengkah 12 nyentuk 21 March tu.

Arini mega madah sebarang orang ke deka meri bantu pemakai ngagai bala ke bejalaika pengawa ngasu baya nya tau datai terus ngagai Dewan Komuniti Kampung Bakong Oya.

“Sida mega ulih betelefon nuju Tuai Operasyen Pegawai SFC Bawing Randi ngena lumur 0178679775.

“Arapka pengawa tu mujur sereta bisi kerejasama ari mensia mayuh,” ku iya.

Berebak enggau nya, Arini ngarapka ulih numbuhka “Volunteer Batang Oya Crocodile Hunter” udah tu ila.

“Tuju tu ngambika Batang Oya seruran likun sereta ngemataka mensia mayuh ti suah nengah sungai tu.

“Arapka pekara tu nerima perati tauka dibai ngagai aum begulai enggaun Opis Residen, Opis Pelilih Dalat, Ketuai Pegawai Eksekutid (CEO) SFC enggau Tuai Genturung Pendiau enggau Tuai Raban Bansa kena Hari Satu tu ila,” ku iya.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak