76 sekula primari aja dibuka di Sibu

SIBU: Sepenyampau 76 ari 84 buah sekula primari dikuasa Opis Pelajar Pelilih (PPD) Sibu berengkah dibuka pagila.

Nitihka penerang berita ari PPD Sibu, lapan buah sekula primari da agi apin ulih dibuka.

“Pengudah diserenih enggau nerima sanding penemu ari Opis Pengerai Bagi Menua (PKB), sekula ba genturung ti mudah kena rampit agi ditangguh.

“Kitai nangguhka dulu lapan buah sekula nya ari 15 nyentuk 19 March tu,” ku penerang nya.

Sekula ti agi ditangguh nya Sekula Primari (SK) St Rita, SJK Sacred Heart Chinese, SJK Uk Daik, SJK Chung Sing, SK Sentosa, SK Sg Durin, SK Ulu Durin Kiba enggau SK Sg Naman.

Dulu ari nya, Pegawai Opis Pelajar Pelilih Sibu, Ahli Chikba udah ngatur aum beratika pengawa muka baru sekula dikuasa PPD Sibu, pagi kemari.

Aum nya diatur begulai enggau Pegawai Opis Pengerai Bagi Menua Sibu Dr Teh Jo Hun.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak