Bantaika produk dagang temuai kita ngagai menua luar

LIMBANG: Komuniti ba menua diperansang ngelakuka produk dagang temuai ke bisi ba menua diri.

Menteri Dagang Temuai, Seni enggau Main Asal Malaysia, Datuk Sri Nancy Shukri madahka komuniti menua tu lebih nemu chara tauka baka ni ngelakuka produk dagang temuai ngagai orang luar.

Ku iya, baka ba Limbang tu ngembuan mayuh produk ke tau diangkat baka produk pemakai, sejarah menua, adat enggau main asal sereta ke bukai.

“Semina kitai aja ke nemu pasal sejarah enggau pengelebih menua diri empu lalu palan nya tau diangkat nyadi palan pematak temuai.

“Bisi mayuh produk ulih nyadi produk dagang temuai lalu ukai semina palan aja tang tau diangkat ari sukut sejarah, adat enggau ke bukai,” terang iya.

Nancy mansutka jaku nya rambau pejalai nemuai seraya gawa ngagai taba Pengerami Lumpur Bebuak ba Kampung Meritam, ditu kemari.

Iya mega madahka Opis Menteri Dagang Temuai benung ngatur pekit ‘Cuti-Cuti Malaysia Travel Wishlist’.
Terang iya, pekit nya tau disereta mensia mayuh lalu sida dipinta nganjung gambar tauka video pandak sereta penerang ke tau narit ati.

“Barang sapa ke deka nemu silik agi pasal tu, kita tau ngelawa website opis menteri dagang temuai ngambi masuk pekit tu lalu bemacham perais nganti kita,” terang iya.

“Kita mega tau berunding pasal utai ke manah nyadi produk dagang temuai maya masuk pekit nya,” ku Nancy nerang.

Nambahka nya ku Nancy, iya mega dekaka komuniti menua tu bekerejasama enggau Opis Menteri Dagang Temuai masuk pekit nya ngambi nusuika sejarah enggau cherita ke bisi di Limbang.

Ku iya, penanggul ditapi kitai ba Malaysia diatu iya nya kurang mantaika cherita tauka sejarah ba sebengkah menua.
Iya mega madahka ari cherita nya mih kitai tau narit ari orang luar nemu silik agi pasal sejarah sebengkah menua ditu.

“Ari cherita pasal sejarah sebengkah menua nya ulih nyadi produk dagang temuai.

“Kitai mega ulih masukka palan pematak nya lalu nama kebuah sida mesti nemuai ke Limbang,” terang iya.

Sama datai Sapit Menteri Perengka Pengangkut Malaysia, Datuk Hasbi Habibollah, Adun Batu Danau Paulus Palu Gumbang, Ketuai Sekretari Motac Datuk Dr Noor Zari Hamat, Pegawai Pelilih Limbang Superi Awang Said enggau Ketuai Kaunsil Pelilih Limbang Sufian Mohat.

Dapatkan kandungan menarik kami di media sosial:
Klik Di Sini -->> Facebook | Tiktok | InstagramYoutube | |  Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak