Pemutus kort mesti diterima manah ungkup pengelantang menua Malaysia

KUCHING: Pemutus Kort Tinggi ngemendarka leka jaku Allah dikena orang Kristian ba Malaysia enda tau dikumbai menang ba siku-siku tauka seraban orang, pia ku Biskop Gereja Anglikan di Sarawak enggau Brunei Rev Datuk Danald Jute.

Iya ti muji enggau nerima manah pemutus nya ngasaika nya kelai pemujur ungkup semua.

“Pemutus tu mesti diterima semua rayat Malaysia ti dekaka menua kitai lantang,” ku iya nerang, ditu ensanus.

Sida ke megai pengarap Kristian ba selampur Malaysia ulih ngena leka jaku Allah enggau tiga leka jaku Arab bukai dalam bup dichelak ungkup tuju pelajar.

Tiga leka jaku Arab ke bukai ti tau dikena iya nya Baitullah, Kaabah enggau solat.

Leka jaku nya tau dikena beduduk ari Kort Tinggi Kuala Lumpur kemari ngaga pemutus perintah udah ngaga pengilap lebuh enda ngemendarka ngena jaku leka jaku Allah dalam taun 1986 ngagai komuniti ukai Islam.

Pekara tu pengudah akim Nor Bee riffin ngemendarka peminta beratika baru akim ari siku suku raban bansa Melanau ari Sarawak ti mega pengarap Kristian, Jill Ireland Lawrence Bill.

Dalam pengawa ngakim nya, Nor Bee madahka gerah ari Opis Menteri Dalam Menua ba taun 1986 enda ngemendarka pengawa ngena empat jaku ti salah ari sukut undang-undang enggau enda patut.

“Pengawa ngena leka jaku nya enda ngeruga pengelantang enggau pengelikun mensia mayuh,” terang Danald Jute.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak