56 pemakai ba Hotel UCSI nyerumba ‘Meriah Sungkey’

KUCHING: Urung 56 bansa pemakai disediaka Hotel UCSI nyerumba program ‘Meriah Sungkey’ sepanjai bulan Ramadan ti deka datai.

Residen Menijar Hotel UCSI Asst. Prof. Christopher Wan Sageng madahka bemacham bansa pemakai disediaka sida iya nya baka pemakai tradisional, Arab, barat enggau bechampur.

“Kelimpah makai bemacham bansa pemakai, mensia mayuh mega ulih ngasai sereta meda rampa menua ti chukup manah laban palan makai diletak ba luar.

“Pengabis nadai, mensia mayuh ti makai ditu kelebih agi raban Islam ulih ngasaika pengerami ngintu Hari Raya laban palan tu diias enggau keresa hari besai nya,” ku iya lebuh dirandau Suara Sarawak ditu, kemari.

Tandu iya, entara pemakai ti popular deka diidangka sida maya nya ila, iya nya Asi Mardy Arab, ikan panggang, kari manuk, manuk panggang, lemang, bubur lambuk, satay enggau ke bukai.

Prof. Christopher Wan Sageng

“Mensia mayuh ti deka makai ditu mesti ngaga booking dulu laban diatu kami semina muka ngagai 60 iku orang tang pemayuh tubuh tu bepanggai ngagai pemutus Komiti Penyangga Penusah Ngenyit Nengeri (JPBN).

“Berengkah ari rega orang besai RM68, kami deka meri diskaun 20 peratus ngagai orang tuai lalu diskaun 50 peratus ngagai nembiak baruh 12 taun,” ku iya.

Dibuka berengkah ari pukul 6.30 lemai nyentukka pukul 10 malam ‘Meriah Sungkey’ diatur nitihka chara bufet.

Barang sapa ti deka ngasai penyelai makai begulai enggau ruang bilik tau betelefon ngagai 082596612 tauka terus nulis pesan ba facebook UCSI Hotel Kuching.

Bemacham pemakai bisi disedia ngagai mensia mayuh nyerumba program ‘Meriah Sungkey’ sepanjai bulan Ramadan ti deka datai.

 

Bemacham pemakai bisi disedia ngagai mensia mayuh nyerumba program ‘Meriah Sungkey’ sepanjai bulan Ramadan ti deka datai.

Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak