Ajar Apai nyadika sempun pejalai pengidup Misha Minut

KUCHING: Filem Belaban Hidup: Infeksi Zombie nyadi tanda pengingat Misha Minut ngagai niang apai iya, Panggau.

Misha madah, taja apai iya udah lama midang tang jaku peransang enggau jaku ajar niang dikeingatka iya belama ngelama tu.

“Nyentuk sehari tu jaku ajar niang apai meruan dikeingatka aku, nyadika sempun kena aku bejalai.

“Nya alai aku ngarapka genap pengawa dikereja ngelama tu ulih ngangkatka nama apai pegari dipeda mensia selampur dunya,” ku iya lebuh ngepunka randau begulai enggau Suara Sarawak.

Ku Misha, peluang diberi direktor Ray Lee kebendar udah ngerandang jalai iya masuk dunya filem lalu nempa nama baka diatu.

Nya kebuah iya beterima kasihka peluang ke udah diberi Ray Lee nya dataika Filem Belaban Hidup: Infeksi Zombie bulih mayuh anugerah ba tikas entarabansa.

“Ngena peluang tu mega aku meri besai terima kasih ngagai indai, anak, menyadi sereta bakih ke enda leju nyukung pejalai aku ngelama tu.

“Jaku terima kasih tu mega dituju aku ngagai semua sida ke udah ngemujurka Filem Belaban Hidup kelebih agi bala bakih ke udah nyukung kami ngelama tu.

“Jaku peransang dikenatai kita ngagai aku tauka ba media rama ngelama tu endang dibacha aku magang lalu nyadi jaku peransang ngambi ransing agi ngaga filem Dayak bukai dudi hari.

“Terima kasih mega nuju raban media ke enda leju nyukung sereta seruran nemu berita baru pasal Filem Belaban Hidup: Infeksi Zombie tu,” ku Misha.

NYERIDI PELAKUN BARU

LANDIK BELAKUN… Pelakun Pablo Amirul (ba mua) ti melakun nyadi Gadang ke alai rumah panjai sida diserang zombie dalam Filem Belaban Hidup: Infeksi Zombie.

Baka orang bukai ku Misha, iya mega bisi juluk ati lalu diatu ba jalai ke betul nuju nya.

“Mayuh agi Filem Dayak ulih digaga lalu diberi peluang megai kelulu udah tu.”

Nya mih juluk besai produser filem enggau penulis skrip, Misha pengudah nama iya dipasuk dalam bup tusun ketiga Ensklopedia ‘Successful People in Malaysia’.

Misha madahka diri udah dirandau siku ari editor Britishpedia ti deka masukka nama iya dalam bup nya.

PELAKUN ENTARABANSA… Direktor Ray Lee (kanan) begambar ungkup kenang enggau bala pelakun baka ari kiba, Weaam Shawaheen, artis Slovakian benama Katrina Gray, pelakun enggau pemuzik Altimet enggau Zenna Debo.

Iya ngarapka berita manah nya ulih nyadi peransang ngagai bala bukai enda mantul ngapa seagi pengingin sida empai nyadi nyata.

“Aku mega ngarap bisi sukung ari agih belanja khas ngatur kelas belajar belakun enggau bekelulu ungkup pengemeran seni Dayak.

“Kebuah pia laban aku deka ngaga cherita ke manah agi sereta begunaka pelakun ti bisi penau enggau landik bekelulu.

“Aku pechaya bansa kitai bisi pengelandik belakun tang ke diatu sida nadai diberi peluang mantaika pengelandik nya.

“Baka ke ditemu kitai, naka diatu ulih dikira ngena jari pemayuh filem kitai udah digaga dalam industri filem Malaysia lalu kitai mega nadai pelakun Dayak ke endang udah entap dalam industri filem,” ku Misha lebuh randau begulai enggau Suara Sarawak, kemari.

BAKA TU… Produser Misha Minut Panggau (kiba) enggau Ray Lee (tengah) meri penerang ngagai bala nembiak Iban lebuh ngaga Filem Belaban Hidup: Infeksi Zombie.

NGANGKATKA FILEM DAYAK

Misha ngarapka mayuh agi orang ngenang pengiruh sida ngangkatka filem bansa Dayak ari pemujur Filem Belaban Hidup: Infeksi Zombie menang mayuh anugerah ba tikas entarabansa.

Nya alai iya bisi amat pengandal berita baka nya tau endar nyadika peransang ngagai rebak dudi ngambi ngaga mayuh agi filem bansa Dayak.

“Tegepang ati laban enda nyangka diri empu dipilih lalu dipasuk ke dalam bup ‘Successful People in Malaysia’ lebuh nerima kangau ari editor nya.

“Kebuah pia laban aku ngasaika diri empu agi baru enggau pabu endar penemu pasal industri filem tu.

“Taja pia aku pechaya, kitai mesti ngembuan ati ke liat enti deka nyapai utai dikedeka ati kelebih agi industri filem ke baru diteresa aku tu.

“Semua kitai bisi penetap penemu kediri empu lalu aku ngembuan penetap penemu, anang takut nguji enggau anang takut nyema utai dikereja aku nya puntan.

“Nambahka nya, kitai anang mendingka jaku orang ti ngemaruhka tauka jaku ti tau ngasuh nuan lemi tang ambi jaku nya nyadika pengering semengat kitai.

“Jaku baka nya patut nyadi peransang ngagai kitai bebendar agi bulih utai dikeingin ati,” ku Misha lebuh ditanya pasal resia iya ulih mujur datai ba tikas entarabansa.

BUDAYA DAYAK… Ray Lee meri penerang ngagai sida ke melakun nyadi bujang berani Iban dalam Filem Belaban Hidup.

LIAT ATI

Nambahka nya ku Misha, kitai enda ulih nyeliahka diri ari sebarang penanggul ke tau nyadi ba genap pengawa dikereja kitai.

“Taja penanggul ke nyadi nya tau ngelemika semengat tang aku semampai ngeringka ati napi semua penanggul ke nyadi.

“Semangat baka tu patut dikembuan kitai, anang takut nguji baru nyema pengawa dikereja kitai nya puntan.

“Pekara pemadu beguna, anang sesekali mandingka pemandai diri enggau orang bukai laban nya tau ngasuh nuan nadai pengandal ngagai diri empu.

“Belajar ari pengilap ngambi kitai ulih ngereja pengawa nya enggau manah agi,” ku jaku peransang Misha.

Lebuh ditanya baka ni teulihka runding ngaga Filem Belaban Hidup: Infeksi Zombie tu, Misha madahka iya ngembuan penemu ti sebaka enggau Direktor, Ray Lee.

Ku Misha, iya teulihka runding ngaga filem tu ari minat rindu meda cherita berantu kelimpah minat ngaga makeup sfx.

Berebak enggau nya, Misha madahka Ray Lee teulihka runding ngaga filem tu laban rindu meda orang ngerasuk ngepan asal Iban.

“Ari nya tadi, kami duai sama berunding deka ngaga cherita ti mantaika adat enggau ngepan asal sereta gaya idup bansa Dayak ti bserakup ba rumah panjai.

“Batang tuju kami duai ngaga filem tu endang deka ngangkatka budaya bansa Dayak ngambi dikelala ba serata dunya.

“Ari cherita pandak digaga dalam taun 2016, kami duai ngaga nyadi siti cherita pengelama sejam setengah dalam taun 2019.

“Naka pengaga lebuh filem tu mujur menang mayuh anugerah ba tikas entarabansa laban tu mandangka filem kitai Dayak ulih diangkat sereta dikelala ba tikas dunya,” ku Misha mulaika kenang terubah seduai ngaga Filem Belaban Hidup: Infeksi Zombie.

LANSA

NGANGKATKA FILEM DAYAK… Misha benung nyinuk beratika sida ke benung melakun Filem Belaban Hidup: Infeksi Zombie nya.

Anugerah diterima Filem Belaban Hidup: Infeksi Zombie

Best Horror Feature Film di World Film Carnival Singapore

Best Horror and Best Feature Film St. Peterburg Russia

Best Feature Film Sweden

Best Features Film Canadian Diversity Film Festival

Athens International Art Film Festival

Best Horror Paris Film Festival

Screening three day at Los Angeles World Film Festival

 


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak