Centexs diaku nyadi pengidar produk Greenleaf Sarawak

KUCHING: Centre Of Technical Excellence Sarawak (Centexs) diaku nyadi pemungkal pengidar produk ai irup serikat Greenleaf Sarawak ngagai Semenanjung Malaysia ngambika ulih dijual ba pasar besai enggau palan bebeli barang di serata menua.

Menijar Besai Centexs Komersial Shahren Yusri madahka asil kerejasama tu ila deka ngelancharka siti agi produk ai irup pemadu baru iya nya ‘Coffee Special’ begulai enggau produk ai irup ti chukup laku dikeluarka serikat nya sebedau tu iya nya ‘Teh C Special’ ketegal peminta ti majak tinggi.

“Centexs Komersial milih serikat Greenleaf Sarawak nyadi bakih kunsi laban serikat tu bepalan di Sarawak lalu dipungkal anak Sarawak empu.

“Nengah peluang kerejasama tu, kami ulih muka peluang penatai pemisi ngagai orang ba luar tauka orang dagang nyadi stokis, ejen tauka ejen dropship ngelakuka ai irup tu ba Semenanjung Malaysia,” ku iya.

Shahren bejaku munyi nya lebuh aum media di Heritage Central Cafe Jalai Masegit ditu, kemari.

Ku iya, mensia mayuh ti deka nyadi stokis, ejen tauka ejen dropship ngelakuka ai irup nya anang irau laban produk ai irup ti dikeluarka Greenleaf Sarawak bisi ngembuan setipikit Halal.

“Pekara ti nyelai pasal produk ai irup tu iya nya digaga ari dua bansa iya nya asai daun pandan enggau gula apong.

“Produk ai irup tu ila deka dijual ba lima buah pasar besai iya nya Mydin, Malakat Mall, Boulevard Hypermarket, Aeon Retail enggau Hero Mart kelimpah dijual ba 12 pasar renchit ke bukai di Semenanjung Malaysia enggau Sarawak.

“Kami nyendiaka pelasar dikena mantu mensia mayuh iya nya mantu sida nyual produk ti dibai ngusung kami kitu, ukai semina deka negapka dagang aja,” ku iya.

Tandu iya, naka diatu bisi RM30,000 produk ai irup ‘Teh C Special’ ari serikat nya udah dijual Centexs kenyau dua minggu ke udah.

Sama bisi datai Direktor Greenleaf Sarawak Lester Ong enggau ke bukai.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak