Dua agi kluster baru ditemu, Kluster Putai enggau Kluster Rayang

KUCHING: Opis Pengerai Nengeri Sarawak sehari tu ngenukuka dua agi kluster baru Covid-19 ditemu iya nya Kluster Putai di Bukit Mabong enggau Kluster Rayang di Serian.

Komiti Penyangga Penusah Ngenyit Nengeri (JPBN) nengah penerang media madahka Kluster Putai di Bukit Mabong ditemu datai ari pengereja kunterik ti gawa ba projek ngempang hidroelektrik di Putai, Ulu Baleh di Pelilih Menua Bukit Mabong.

Kes indeks tu ngaul siku indu ke beumur 39 taun ti ditemu ari peresa sebedau gawa ba palan nya pengudah iya kemisi ba Pelilih Menua Kapit.

Indu nya ditukuka positif Covid-19 kena 18 April lalu pansik silik madahka indu tu bebakih enggau dua iku kes dalam Kluster Pasai ti ditukuka punas kena 13 April tu tadi.

Kluster Rayang, Serian ditemu berampit ari sebuah komuniti ba Kampung Rayang di Serian.

Kes indeks keterubah dirikodka kena 6 April ngaul siku indu ke beumur 50 taun ti bisi bekaul rat ngagai kes positif bukai.
Kes indeks tu gawa ba Opis Pelajar Serian lalu iya ditukuka positif Covid-19 kena 5 April tu tadi.

Berebak enggau nya, JPBN ngaga pemutus bejalaika PKPD di Rumah Mathew, Lubok Pisang, Genega, Pakan (22 April nyentukka 5 Mei), Rumah Dinggai, Sungai Amut Atas, Pakan (22 April nyentukka 5 Mei) enggau Rumah Giman, Batu 13 Jalan Engkamop, Pakan (23 April nyentukka 6 Mei).

Penerang nya mega madahka, pelilih menua ti agi ba status gadung diatu semina tinggal dua buah aja. Kemari mega, Pelilih Menua Lawas bebali ke status kuning pengudah ngerikodka siti kes baru.

Tu ditangkanka enggau Pelilih Menua Lundu ke bebali ngagai status oren ketegal 36 kes berampit dirikodka ba pelilih menua nya. Taja pia, Pelilih Menua Julau enggau Matu pulai ngagai status oren ditangkan Pelilih Menua Sebauh pulai ngagai status kuning.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak