Jereki ari ngaga Pua Tampung Seribu

KUCHING: Lebuh ngenang pemujur diri ulih nyual Pua Tampung Seribu manggai rega RM700 sehari, Ina Kimlen, 64 taun madahka diri chukup berasai gaga.

Indai ngagai tiga iku anak tu madahka pengawa lepa diau di rumah diguna iya ngaga Pua Tampung Seribu ti dipesan mensia mayuh.

“Aku berengkah ngaga Pua Tampung Seribu kenyau 10 udah lalu, belajar ari orang ti udah landik.

“Diatu laban dunya majak moden, aku belajar ari media rama kelimpah dibantu uchu aku empu,” ku iya lebuh dirandau Suara Sarawak, kemari.

Ina ti datai ari Kampung Arus Sebangan madahka sekeda chunto chura tampung seribu ti digaga iya deka dichelak bala uchu ke malin iya maya deka ngaga jemah.

Pua Tampung Seribu

“Ukai semina pua aja digaga aku, laban kekadang aku bulih peminta ngaga tampung seribu lapit mija, lapit bangku enggau lapit bukai ti engkeman.

“Chura ti dipinta pemeli mega bebida, bisi sekeda rindu ke chura jelu baka mayau, ukui, semut enggau tekura, lalu sekeda rinduka chura bungai enggau ke bukai,” ku iya.

Nyerita pasal orang ti meli, Ina madahka tampung seribu dijait iya kala datai di Semenanjung Malaysia.

“Kala datai di Melaka Pua Tampung Seribu ti digaga aku tu.

“Lebuh bisi program gempuru gerija suba aku suah bejual din, maya nya chukup gaga ati aku laban urung tiga tauka empat lambar dibeli orang.

Ina Kimlen, 64 taun.

“Kelimpah ari nya, anak enggau uchu aku mantu nyual ngagai bala bakih enggau pengelicha sida,” ku iya.

Tandu Ina, kelimpah bekebun sayur pengawa nyait Pua Tampung Seribu nyadi pengawa dikena nyeliahka mata lebuh deka ngantuk.

“Pua Tampung Seribu dijual aku nitihka pemesai, ke besai urung tiga meter berega RM300, jelan pemesai urung dua meter setengah dijual ngena rega RM200, bisi mega pua ungkup nembiak mit dijual aku RM50 nitihka peminta.

“Pua ti pemadu besai begunaka awak dua bulan baru tembu, tang pua ke mit dalam sebulan aja ulih tembu,” ku iya.

Iya madahka, rega kain ti majak mar nyadi entara pemar ti ditapi iya lebuh ngaga pua tampung seribu diatu.

“Kelimpah ari nya, mata aku enda entu lansik diatu, nya alai aku bisi lubah mimit nembuka pua ti diudar orang.

“Suba semeter kain semina RM2 aja, tang diatu manggai rega RM4 semeter,” ku iya.

Ina ngarapka dagang pua tampung seribu tu terus mujur dikena nambahka penatai pemisi iya jemah.

“Semadi nadai pengawa diau ba rumah, nya aku ngaga pengawa tu ngiga anak belanja.

“Ngarapka aku meruan gerai awakka ulih nangkup peminta orang ngaga Pua Tampung Seribu pagila lusa,” ku iya.

Iya mega ngarapka, pengawa nyait Pua Tampung Seribu ulih ditampung nembiak rebak baru ba maya ti deka datai.

Sapa ti deka ngudar Pua Tampung Seribu ari Ina, kita tau betelefon ngagai iya empu ngena lumur 0168070513.

Sapa ti deka ngudar Pua Tampung Seribu ari Ina tau betelefon nuju lumur 0168070513.

 

Pua Tampung Seribu

Pua Tampung Seribu


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak