Kelas diias kreatif, awakka nembiak rindu agi belajar

SARIKEI : Lebuh tama ngagai tiap kelas Sekula Sekondari (SMK) Julau tentu ati nembiak ransing agi deka besekula laban ulih meda chura enggau ias kelas ti kreatif.

Pia mega, pengawa nyadi pengajar enda muntang, dalam timpuh pandemik Covid-19, mayuh pemar udah ditapi.

Taja pia, bagi siku pengajar ari sekula nya Hamzah Mohd Azizan, 37 iya datai mantu nembiak ngias kelas nengah kretiviti sereta agih belanja iya empu.

“Aku seruran nanam motto ‘kelas nyadi rumah kedua nembiak’ enggau endang udah gaya mensia rindu meda rumah diias manah, nya deka meri mood positif pengajar enggau nembiak maya ba kelas.

“Kelimpah ari nya, aku deka ngayanka gaya ti bebida lebuh tama ke dalam kelas taja pan begunan enggau kelas tu udah manggai umur 50 taun,” ku iya lebuh dirandau Suara Sarawak, kemari.

ADU MANAH.. Entara pengawa digaga pengajar Hamzah dikena ngelagu kelas awakka nembiak rindu agi belajar.

Ngelansa pasal sejarah, sekula tu bepun beroperasyen ba taun 1966 seraya numpang ba Sekula Primari St Aphonsus.

Udah nya sekula tu lalu mindah ngagai begunan baru ba taun 1970 di ili Sungai Julau urung 0.5 kilometer ari palan lama nyentukka diatu.

Taja beumur lebih 50 taun, iya madahka begunan ti lama enda ulih nyadi ketegal iya enda kretif enggau besemangat ngias kelas, laban iya pechaya gaya kelas ti manah ngasuh kelas nya lebih baru ba mata nembiak.

Apin lama iya mega udah dikangauka raban Didik Tv, NTV7 ngambika ulih bekunsi kisah nya ngagai mensia mayuh di serata menua pasal keni iya ulih ngemanahka kelas ti dikerapka ulih ngasuh nembiak rindu belajar.

Ku iya, raban NTV7 nengah facebook TeacherCollection (TC) kena 1 April ke udah lalu meri peluang ngagai bala pengajar bekunsika chara ngias kelas laban ku iya NTV7 balat tekait ati meda pekara ti dikunsika tim dalam facebook nya.

ADU MANAH.. Entara pengawa digaga pengajar Hamzah dikena ngelagu kelas awakka nembiak rindu agi belajar.

“Nya alai, aku ngambi peluang tu bekunsika gambar enggau video kelas aku ngagai NTV7 enggau enda nyangka sida udah milih sekula aku ungkup buletin Didik Tv.

“Engka mayuh agi kelas enggau sekula bukai ti lebih manah, tang engka ketegal SMK Julau udah manggai 50 taun, nya alai sida milih sekula aku tu,” ku pengajar ti ngajar subjek Dagang sereta Langkar enggau Teknologi nya.

Tandu iya, dalam pengawa tu iya sanggup ngeluar belanja ninting taun kenyau taun 2016 nyentukka 2020 sereta mai nembiak Pom 1 ngagai Pom 5 ngias kelas sida.

“Timbal nembiak endang positif laban pengawa tu suah dipejalai sebedau sekula berengkah.

“Nembiak seruran mantu ninting maya enda ngira nembiak ti diau ba buding tauka pulai hari.

“Urung RM2,000 ungkus udah dikena ngias kelas ba sekula tu,” ku iya.

Pia mega, ku Hamzah pengawa ngias kelas digaga biasa aja ngambika ngemuntang pengawa sida ngiga chura ti udah dipilih.

“Taun tu, aku milih siti chura lalu aku deka ngias kelas nitihka chura ti udah dipilih, sukung ari raban sekula mega positif nya ngasuh pengawa kami majak muntang,” ku iya.

Iya madahka, kunchi pemujur pengawa tu mesti bisi minat enggau niat ti tegap, laban buah runding ulih digiga muntang agi.

“Minat mesti bisi. Niat mega mesti lurus laban ngias kelas ukai ungkup nyadi champion tauka mekit orang, tang dikena ngait ati nembiak awakka sida gaga belajar dalam kelas ti kondusif.

“Taja pia, aku seruran nentuka pemeresi kelas dijaga. Enti kelas aja manah pan nadai guna enti nadai beresi,” ku iya.

ADU MANAH.. Entara pengawa digaga pengajar Hamzah dikena ngelagu kelas awakka nembiak rindu agi belajar.

Anak ti asal ari Kampung Bintangor Meradong nya mega bisi bekunsika ngagai Suara Sarawak sekeda pemar ti ditapi iya maya ngias kelas.

“Entara pemar iya nya milih chura ti engkeman ngagai kelas, kekadang barang ti deka dibeli nadai ba kedai, kelimpah ari nya aku suah ngingatka nembiak ngintu kelas sida manah laban nembiak kekadang enda mending.

“Sekumbang Atur Mindah Betangang (PKP) taun nyin kemari enggau kemisi ti kelalu lama, asai rugi muai duit ngias kelas laban enda dikena maya nya,” ku iya.

Iya ti senang agi dikangau Hamuza, Cikgu enggau Bro mega pechaya mayuh agi pengajar ti bepenau ba luar ti sama ngayanka runding ti kreatif tu.

“Sekeda ari sida pandai bejait, tang aku semina nemu meli enggau ngias aja,” ku iya.

Iya mega ngelalau raban pengajar ba luar ngias kelas ukai tuju ti besai.

“Bisi pekara bukai ti lebih beguna baka ngajar enggau ngemanahka ulah sida. Ngias kelas semina dikena meri semangat nembiak laban kitai nyadi pengajar patut nyadi chunto ngagai sida.

“Lalau aku ngagai raban pengajar ti bepenau ba luar, asilka pekara ti ulih ngait ati nembiak awakka sida ulih ngenang sereta meri empas dalam pengidup maya keluar ari dunya sekula ila.

“Anang kelalu ngerunding nadai ungkus enggau duit. Duit endang meruan bisi tiap bulan. Pengaga nembiak belajar mar diulih ungkup pengidup sida jemah,” ku iya.

ADU MANAH.. Entara pengawa digaga pengajar Hamzah dikena ngelagu kelas awakka nembiak rindu agi belajar.

 

DIPANDANG NGAGAI ORANG MAYUH… Pengajar Hamzah dikangau NTv7 nusuika peneleba iya ngagai mensia mayuh ba selampur Malaysia pasal pengawa iya ngemanah kelas nengah program Didik Tv.

 

DIPANDANG NGAGAI ORANG MAYUH… Pengajar Hamzah dikangau NTv7 nusuika peneleba iya ngagai mensia mayuh ba selampur Malaysia pasal pengawa iya ngemanah kelas nengah program Didik Tv.

 

DIPANDANG NGAGAI ORANG MAYUH… Pengajar Hamzah dikangau NTv7 nusuika peneleba iya ngagai mensia mayuh ba selampur Malaysia pasal pengawa iya ngemanah kelas nengah program Didik Tv.

 

 

 


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak