Kluster Jalan Sultan Iskandar ditemu di Bintulu

KUCHING: Opis Pengerai Nengeri Sarawak (JKNS) udah ngenukuka siti kluster baru iya nya Kluster Jalan Sultan Iskandar di Bintulu.

Kluster Jalan Sultan Iskandar tu kluster endur gawa ti ngerampit orang gawa perintah ba sebuah opis perintah di Jalan Sultan Iskandar di Bintulu.

Indeks kes ngagai kluster tu iya nya kes ke-18,172 ke mega siku lelaki peranak menua udah beperesa nengah pengawa meresa orang ti bisi kelai kena rampit di Klinik Pengerai Bintulu kena 5 April tu tadi.

Iya mega ditemu positif Covid-19 kena 6 April tu tadi. Lebuh meresa sida sebilik, bakih sama gawa enggau kontak kasual, 26 kes udah ditemu positif Covid-19 nyengkaum kes indeks seraya 358 iku ditemu negatif enggau 56 iku agi nganti pemutus makmal.

JKNS madah, Kluster Bukit Tunggal di Julau ditukuka udah punas pengudah nadai ngerikod kes baru ba timpuh 28 hari ke udah seraya 49 kluster agi ngerekai di Sarawak.

Pelilih Bukit Mabong udah mali ngagai status oren pengudah ngerikod 26 kes berampit dalam menua ba timpuh 14 hari ke udah.

Nambahka nya, Komiti Penyangga Penusah Nengeri (JPBN) madahka Atur Mindah Betagang Diterit (PKPD) ba Kampung Binyu Baru, Samarahan diketu pengudah nadai ngerikod sebarang kes baru positif Covid-19.

Pia mega, JPBN udah ngaga pemutus pasal PKPD deka dipejalai ba empat endur.

Tu nyengkaum PKPD ba Rumah Bajak, Nanga Semawang, Julau berengkah ari 14 nyentuk 27 April tu seraya PKPD ba Rumah Nanggai Sungai Stok di Sarikei deka diterit berengkah 15 ngagai 21 April tu.

Kelimpah ari nya, PKPD mega deka diterit ba Pulapol di Kuching berengkah ari 16 ngagai 29 April tu beduduk ari kes positif Covid-19 majak nambah dia.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak