Kluster Sungai Gemuan di Meradong

KUCHING: Opis Pengerai Nengeri Sarawak kemari ngenukuka siti agi kluster baru dirikodka iya nya Kluster Sungai Gemuan di Meradong.

Chairman Komiti Penyangga Penusah Ngenyit Nengeri (JPBN) Datuk Amar Douglas Uggah Embas madahka naka diatu bisi 45 kluster agi ngerekai dirikodka ba Sarawak.

“Ari penyampau nya 15 kluster bisi nambah ke alai 30 kluster mengkang enda berubah.

“Pia mega, Pelilih Menua Mukah bebali ari status kuning ngagai status mirah pengudah ngerikodka 53 kes berampit dalam timpuh 14 hari,” ku iya.

Uggah bejaku munyi nya ba aum media Covid-19 di Dun Lama ditu, kemari.

Tandu iya, pelilih menua ba status mirah diatu nambah 13 buah enggau pelilih menua oren bisi lima buah.

“Pelilih Menua Subis bebali ari status kuning ngagai status mirah kemari lebuh 28 kes berampit dirikodka dalam timpuh 14 hari.

“Diatu semina 17 pelilih menua ba status kuning enggau lima pelilih menua ba status gadung,” ku iya.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak