Komuniti Penan di Ulu Jelalong, Tubau udah nerima bekal karan 24 jam

MURUM: Sebagi ari genturung pendiau komuniti Penan di Ulu Jelalong, Tubau ditu udah nerima servis bekal karan 24 jam nengah Projek Bekal Karan Menua Pesisir Penyambung Grid (RES-Last-Mile).

Adun Murum Kennedy Chuk Pai Ugon madahka, entara genturung pendiau komuniti Penan ke nerima bekal karan nya nyengkaum Rumah Jusong Peling enggau Rumah Talip Punai di Ulu Sungai Kebulu, Jelalong.

Lebuh ngelansa pasal pemansang ba Rumah Jusong Peling, iya madahka kelimpah ari projek bekal karan nya, peranak ba genturung pendiau nya mega merambu deka nirika rumah panjai baru.

“Pengawa nirika rumah panjai tu deka digaga ba taba baru semak enggau rumah sida ke diatu,” ku iya.

Iya madah munyi nya lebuh ngulu pengawa Jelajah Sarawakku Sayang di Ulu Jelalong, Tubau, apin lama ke udah.

Kennedy mega madahka, projek Transformasyen Menua Pesisir (RTP) nyungkur taba rumah panjai baru ba Rumah Talip Punai udah tembu dipejalai.

“Naka ke diau, peranak ba rumah panjai tu benung masang pelin rumah panjang baru sida.

“Kami deka meri bantu bekal atap rumah nengah projek MRP-PPRMS ngambika peranak kitai ba ditu ulih nembika kerja masang atap ngena chara beripai,” ku iya nerang.

Kelimpah ari nya, Kennedy mega meri besai terima kasih ngagai Perintah Sarawak ti udah chukup siru enggau guna rayat ba menua pesisir kelebih agi ba sitak iya nya.

Kennedy mega nambah, sekumbang ‘Jelajah Sarawakku Sayang’ nya dipejalai, iya ngambi peluang meda kediri guna rayat enggau matau projek ke benung tauka udah dipejalaika ba menua Ulu Jelalong.

“Pekara tu ngambika ulih ngemuntangka agi perambu kitai jemah ila ba pengawa pemansang, meri guna sereta pengelantang ungkup rayat kitai,” ku iya.

Ku Kennedy, Program Jelajah Sarawakku Sayang ti diatur kenaka 17 April ba genturung pendiau nya dikena nerangka penanggul menua, nyengkaum pengerekai igi penyakit Covid-19 enggau guna pengawa bertuchuk vaksin ngambika ulih nagang pengerekai Covid-19.

Berebak enggau nya mega, program nya dipejalai ngambika ulih nerangka chara nagang pengerekai igi penyakit nitihka atur ti udah ditetapka Opis Menteri Pengerai Malaysia (KKM) enggau Komiti Penyangga Penusah Ngenyit Nengeri (JPBN) Sarawak, kelimpah ari mending sereta meda kediri penanggul enggau guna rayat ba renggat baruh.

Bela bisi datai ba pengawa nya, Sekretari Politik Kepala Menteri Michael Mujah Lihan, Tuai Komuniti Tubai Pengulu Awai Anyie enggau Pengulu Sebelu Undol sereta pengari ke bukai.

AGA PENGERAI…Chuk Pai (tiga kanan) nyuaka pemeri sengkabung mua ngagai siku peranak rumah panjai di Murum.

Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak