Lima pelilih menua di Sarawak mengkang PKPB

KUCHING: Komiti Penyangga Penusah Nengeri (JPBN) Sarawak udah ngaga pemutus lima buah pelilih mengkang diterit Atur Mindah Betagang Belebas (PKPB).

Chairman iya, Datuk Amar Douglas Uggah Embas madah, lima buah pelilih mengkang diterit PKPB iya nya Pelilih Sibu, Kuching, Miri, Bintulu enggau Meradong ukai baka berita dibantai sebelah media rama.

Ku Uggah, nitihka peneleba Sarawak sebedau tu, atur PKPB enggau SOP ti diterit nya ulih nagang pengerekai igi penyakit di menua tu lalu JPBNS semina neritka Atur Mindah Betagang Diterit (PKPD) ba endur ti ngerikod mayuh kes.

Uggah madah, JPBNS irau deka ngatur PKP lebuh neritka atur ba endur ke besai baka neritka PKP ba Sibu berengkah ari 15 Februari nyentuk 1 March tu tadi.

“PKPD tu muntang agi diterit kelebih agi ba endur ditemu bisi ngerikod mayuh kes lalu rumah panjai tauka genturung pendiau ti ngerikod kes positif deka bepekul enggau lengkas,” terang Uggah.

“Sarawak kemari ngerikod 512 kes baru positif Covid-19 ngujungka kes positif nambah ngagai 21,960 kes.
“Bintulu ngerikod 120 kes ditangkan 99 kes ba Sibu, 80 kes di Subis, 56 kes di Kuching, 31 kes di Miri, 30 kes di Kapit, 29 kes di Meradong, 22 kes di Serian, 10 kes di Kanowit, semilan kes di Samarahan enggau tujuh kes di Sarikei.

“Pia mega, enam kes di Bukit Mabong, tiga kes di Limbang, dua kes di Kabong sereta bela siti kes ba Asajaya, Bau, Belaga, Beluru, Julau, Saratok, Song enggau Sri Aman.

“Ari 512 kes dirikodka kemari, 61 iku ditemu udah mantaika kelai kena rampit igi penyakit Covid-19 lebuh peresa chulit seraya 425 kes nya ari orang ti diasuh kuarantin ba palan kuarantin ti udah disedia.

“Dua kes pemati dirikodka kemari ke alai kes pemati ke-134 nya kes ke-16,167 mungku siku lelaki peranak menua beumur 61 taun dipasuk ba Sepital Sibu laban bisi mantaika kelai renga, batuk enggau begunaka kereban kena enseput.

“Iya ditemu positif Covid-19 kena 29 March tu tadi sereta bebadi nyawa kena 14 April tu tadi kelimpah ditemu bisi penyakit tinggi darah enggau batuk rangkai.

“Kes pemati kedua nya kes pemati ke-135 mungkur kes ke-18,273 ke mega siku lelaki beumur 71 taun dipasuk ba Sepital Miri laban bisi mantaika kelai batuk, pedis enseput enggau begunaka kereban kena enseput.

“Iya ditemu positif Covid-19 kena 6 April tu tadi lalu ditukuka bebadi nyawa kena 15 April tu tadi seraya bisi penyakit tinggi darah,” terang Uggah.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak