MA63: Peminta Sabah, Sarawak mesti dikemujur lengkas

KUALA LUMPUR: Perintah Perikatan Nasional (PN) diiring Menteri Besai, Tan Sri Muhyiddin Yassin patut lengkas nentuka peminta Sabah enggau Sarawak nengah Sempekat Malaysia 1963 (MA63) diberi jampat.

Felo Kanan Kaunsil Profesor Menua, Dr Jeniri Amir, nyema pekara nya terus dimain, nya deka nyadi ‘pemedis’ ngeruga PN ba Pengawa Bepilih Besai ke-15 (PRU15) ila.

Ku iya, Muhyiddin enggau PN nadai pilih bukai kelimpah nentuka atur tauka semua semaya ke udah dipekat dalam MA63 dititihka lengkas.

“Nama utai ke pemadu beguna diatu iya nya semua semaya ke udah disebut ngagai rayat Sabah enggau Sarawak patut dititih sereta badu betangguh.

“Tu beduduk ari isu tu udah kelalu lama ditatam lalu nya udah dikerandau kenyau jeman perintah Barisan Nasional (BN) lalu udah nya maya pegai perintah Pakatan Harapan (PH) enggau diatu PN,” ku iya maya dirandau Astro AWANI kena Hari Empat.

Taja pia ku iya, pengawa ke udah dipadandang Menteri Besai dalam mutarka isu tu nyata dipeda nengah penumbuh Opis Menteri Pekara Sabah enggau Sarawak.

Nya alai enggau penumbuh nya, dikearap ulih berundingka chara mutar ke isu bekaul MA63.

“Aku andal tu deka mandangka siti pengawa manah digaga PM lalu nentuka semua isu bekaul MA63 ulih diputar nyerumba PRU deka datai.

“Nyema nadai sebarang insur, tu deka nyadi siti agi pekara ke deka diangkaika penyakal ba PRU ke 15 ila,” ku iya.

Nya alai MA63, kati peminta nya ulih diputuska sebedau PRU-15?

Sebedau tu Muhyiddin maya nemuai ke Sarawak madah, ripot enggau perambu bekaul atur mutarka isu silik bekaul enggau Sempekat Malaysia 1963 (MA63) deka dibantai dalam Aum Khas MA63, minggu tu.

Tandu iya, ripot ke deka dibantaika tiga komiti ke baru ditumbuh nya mungkur Komiti Pengereja Pengawa Bakih Kunsi, Komiti Pengereja Pengawa Pengelikun Nengeri Sabah enggau Sarawak sereta Komiti Pengereja Pengawa Sosioekonomi.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak