Pemansang enda ibuh dipolitik

LIMBANG: Anang marit pemansang ti dipejalai perintah enggau politik ketegal deka ngasuh rayat saru penemu.
Adun Batu Danau, Paulus Palu Gumbang madah mayuh penerang bula dibantai ketegal mejah pemansang ti udah dipejalaika perintah ungkup rayat.

Ku iya, berita bula ti dibantai pasal Projek Transfomasyen Menua Pesisir (RTP) Projek Jalai Semin di Kampung Belading udah dipejah mensia mayuh.

“Projek RTP Ngaga Jalan Semin ba Kampung Belading ti diayan ba media rama udah dipejah mensia mayuh lalu aku dituduh salah guna agih belanja nya.

“Tang kebendar, projek nya udah tembu penuh lalu pekara nya udah ditukuka ejensi pengatur iya nya Opis Kereja Raya (JKR) Limbang nengah ripot ti dibantaika rambau aum ngaduka RTP Dun Batu Danau,” terang Paulus.

Paulus mansutka jaku nya lebuh bejadika Program Tuai Komuniti Dun Batu Danau ti diatur ba Balai Bunga Raya, apin lama ke udah.

Paulus nyemetak madahka sida deka neritka atur undang-undang enti sema bisi orang ngereja ulah baka tu ke tau ngasuh rayat saru penemu.

“Enti pekara tu majak nyadi, kami deka neritka atur undang-undang ngambi pekara tu badu nyadi,” ku iya nyemetak amdah.

Nambahka nya ku iya, perintah udah bejalaika mayuh projek pemansang udah dipejalai ba Dun Batu Danau kenyau ari taun 2015.

“Bisi 186 bengkah projek pemansang benung enggau udah tembu dipejalai baka projek ngaga begunan, infrastruktur, perengkaguna lumba enggau ke bukai.

“Projek tu endang meri empas besai ungkup pemansang rayat ba kandang menua tu,” terang Paulus baru.

Sama datai Pegawai Khas Ukas, Datuk Takun Sunggah, Tuai Raban Nembiak PBB DUN Batu Danau, Kaunsilor Elvis Mathew enggau Sapit Chairman Serakup Dayak Iban Sarawak (Sadia) Pampang Limbang, Jangan Bakar.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak