Pemesai reti tajau ba pengidup Iban

Pengawa meri tajau mandi jarang amat dikereja kemaya hari nyerumba pemansang dunya enggau pengarap ti dipegai kitai bansa Iban jeman diatu.

Semina sida ti agi ngembuan pesaka tajau lama, tebal agi sida ti ngibun tauka nampung bilik tuai endang agi ngemeranka pengawa tu nitihka adat enggau chara ngintu tajau.

Nyadi Suara Sarawak deka mai kitai ngelansa silik agi kenang pasal tajau, sebengkah keresa enggau pengeraja ba bilik penaik Iban ke beberita berani muting geraji, tebangkar nama landik ba tunjuk jari.

Kenang kitai sekali tu ngeraup reti tajau ba daya idup, pengawa tauka adat meri tajau mandi enggau guna tajau ba pengidup kitai bansa asal ke dulu berumpangka Tanah Kenyalang.

INTU ENGGAU PENYIRU… Sida ke tuai chukup siru lebuh ngintu keresa lama baka tajau.

KERESA TUAI

Siku bakih benama Victor Ason, peranak asal Langgir, Lingga ti bebini ngugi ke bilik pengajar Usang di Ulu Rimbas, Debak bekunsika kenang mengga mimit pasal pengawa meri tajau mandi.

Iya madahka diri kala dibai orang tuai ba bilik sida meri tajau mandi tang ngena chara baru, nitihka pengarap Kristian.

Ku iya, pengawa nya dikereja sida sebilik ati diri, ngunsut tauka nuchi tajau nya ngena minyak diserungut leka sampi tauka sembiang nitihka pengarap diri empu.

“Enti kelia, tu mih keresa tuai ti pemadu iya berega dikemisi ba bilik penaik siku-siku, nyadika pemandang pemisi orang ke ngempu bilik nya.

“Kitai enggai nyadi muai keresa baka tu pia aja, tang patut diibun enggau diintu nitihka pematut, minta sanding penemu ari orang ke anda agi ngambi kitai enda salah intu.

“Ari nya aku temegah ati endar laban ampit meda pengawa meri tajau mandi, bisi ga penemu mimit dikunsi enggau bala anak enggau bala bukai,” ku iya lebuh dirandau Suara Sarawak.

RAJA BERANI

Victor madah, nyadi utai ka besai bendar guna dikembuan bansa Iban kenyau ari kelia menya sampai ke diatu nadai lebih ari pemerani, pemulih padi enggau pemulih tajau.

“Enti orang nya berani lalu iya bumai bulih padi sereta lalu tebelika tajau ngena padi ke lebih empa, orang nya tau dikumbai kitai Raja Berani.

“Iya ga raja, iya ga berani. Nya alai iya tadi disebut orang petang pah kiba, betelaga ba tengah tapa,” ku iya nampung kenang sida ke tuai.

Nyadi enti orang semina naka berani, tang enda lantang diau laban enda teulihka padi lalu nadai mega kala meli tajau, orang nya semina naka tau dikumbai Bujang Berani.

Kebuah alai orang nya tau dikumbai bujang berani ku Victor ke siru agi dikangau Dom, laban jari iya udah dicharengga darah munsuh, kala basah jari.

Pia mega lebuh gawai tajau didiri, dia orang ke berani diasuh duduk mangkang pandung tajau, sereta nanggung tajau ari bilik ke ruai, lalu nanggung ari ruai ke bilik.

Kebuah alai orang nya tau diasuh ngereja pengawa nya laban iya udah ngereja pengawa chukup ba niat ati anak Iban, ku Dom nerang.

TEMEGAH… Victor tauka Dom begambar melakangka sekeda tajau ti udah diduduk enggau didijir manah tisi dinding ba bilik sida.

PEMESAI GUNA TAJAU

Nyadi tajau nya ku Dom, alai iya bangat beguna besai ba bansa Iban, laban iya tau kai soldadu diau.

Reti soldadu diau nya, enti orang bisi ngereja penyalah, lalu sida bisi tajau kena betimbang.

Ku Dom madah baru, enti sema siku mensia bisi tebunuhka orang, iya bisi tajau kena mayar pati nyawa ngagai kaban belayan orang nya.

Iya enda mudah tepasuk ngagai bilik orang lalu nyadi pengurang orang nya enti orang nya enda bidik, enda lansik, enda betuah, enda belimpah, nadai burung tauka mimpi manah.

Baka nya mega ku Dom lebuh maya menua agi sabuh agi kachuh, maya orang agi gila betempuh kelia, enti tuai kayau nadai tajau dia orang lembau ninggang pengawa iya.

Laban, enti nyema iya bisi salah tempuh, salah bunuh, iya nadai tajau kena betimbang, kena ngisi ukum adat.

Dia kitai sama nemu pemesai guna tajau tu ba adat enggau pengidup kitai Iban, dataika tau dikena nyilih ‘nyawa’ mensia.

BANSA TAJAU

Nya alai diatu lengkaka kitai jerita nya, kitai lalu nyebut sekeda tajau ke besai agi nama, naka utai ditemu enggau dikunsi Dom ngagai Suara Sarawak.

Nyadi tajau ke besai agi nama nya guchi, dalam iya disebut kitai guchi, iya mega mayuh bansa.

Ambika semua nemu, bisi dikumbai orang guchi daun tuak, bulu iya chelum; bisi dikumbai guchi bulan, bulu iya memiang.

Sebengkah agi dikumbai guchi chenanum. Iya ke disebut guchi bendar jarang kitai Iban bisi ngembuan laban iya satengah antu, tau bisi tau nadai.

Nampung kenang sida ke tuai, nyadi tajau tu bisi mayuh bansa tauka nama sereta bisi tingkah rega.

Dom madah, bisi iya dikumbai Tajau Sergiu bulu iya mansau chelum, pending iya melintang.

Taja Sergiu bisi dua bansa. Iya ke lelaki besai agi ari ke indu. Iya ke indu kurang agi ukir.

Nyadi bansa ukir tajau sergiu nya bunga terung enggau tali marau babelit-belit, melit benung tajau nya lalu ukir nya dikumbai orang ukir papan gasing.

Tajau Ningka Pertanda, pending iya melintang. Iya bisi ukir bunga terung enggau ukir tali marau bebelit-belit, melit benung tajau nya.

Iya bisi papan pertanda nganti papan gasing. Sebengkah agi ga bansa tajau ningka dikumbai Ningka Malak.

Iya enda berekung, lalu gamal iya dipeda nyau deka baka tepayan, tang enda ga nyadi.

Tajau Menaga, ukir iya benaga, bulu iya mansau kundong. Pending iya bisi lapan iti unjur lalu beukirka bungai terung bulu sengayuh.

Nambahka nya, tajau Rusa, ukir iya bebingka, bulu iya kuning. Pending iya bisi lapan iti unjur.

Tajau Salang-alang, baka gamal tajau rusa, tang pending iya tujuh iti lalu bulu tajau tu chura kuning.

Enti kitai berati, tajau Alas nya nyau deka baka gamal tajau rusa, tang iya mit agi lalu pending iya bisi tujuh iti.

SIMPUL KENANG

TAJAU GUCHI

Mayuh ga tajau bukai tang nama enggau rega sida mit agi ari sida ke udah kena sebut enggau dikenang Dom dia tadi.

Ungkup penerang semua, tim Ruai Suara Sarawak sebedau tu mega kala bekunsika kenang John Adam Gilbert Anyau pasal tajau ba pendiau kitai bansa Iban.

Ku penemu John, ibun mih tajau enggau naka penyiru laban ukai pengawa ke muntang sereta nyamai aki ini kitai menya bulih keresa berega baka nya.

“Lalu enti maya kita bisi lepa pengawa mega, nadai salah enti kita limpang meri tajau nya mandi.

“Tuju kitai meri iya mandi ngambi ngambi ke isi tauka tubuh tajau nya manah dipeda sereta enda ka nyadi ke alai buyu diau,” ku sadang penemu iya.

Nampung kenang udah tu ila, John deka mai kitai ngenang pasal pengawa meri tajau mandi nitihka rurun ari tusui niang ini bini iya ke benama Nandu Anak Enteri ari Brayang, Roban.

Ari nya kami ba Ruai Suara Sarawak mai kita bala pemacha sama nganti tusun pasal chara sida ba menua Roban meri tajau mandi ba kenang nangkanka tu.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak