Pemutus ngeletak chalun Bersatu di Sarawak diserah ngagai Kepala Menteri

KUCHING: Menteri Besai (PM) Datuk Patinggi Tan Sri Muhyiddin Yassin meri kuasa ngagai Kepala Menteri Datuk Patinggi Abang Johari Tun Openg nentuka pemutus sekalika Bersatu ulih bediri minta pilih tauka enda ba pengawa bepilih besai nengeri (PRN) deka datai.

Muhyiddin ke mega Presiden Bersatu nyerahka pekara ngagai pemanah penemu Abang Johari ke nyadi Chairman GPS sekalika meri lampu gadung tauka enda ngagai Bersatu ngengkah chalun ba PRN tu ila.

Ku Muhyiddin pekara nya deka diperunding enti udah datai maya iya.

“Kitai deka berandau lalu tepulai ngagai penemu Kepala Menteri Sarawak. Enti udah datai maya iya kitai deka berunding,” ku iya.

Iya madah munyi nya ba aum pemberita maya meri timbal sekalika Bersatu ngeletak chalun ba PRN deka datai pengudah iya ngabas begunan baru Sepital Besai Sarawak (HUS) ditu kena Hari Lima tu tadi.

Kenu ku Muhyiddin, Bersatu enggau GPS iya nya bakih ke sama jalai lalu enggai meda sebarang pekara ke ngasuh pambar.

“Udah pengawa bepilih besai nengeri, kitai ngarapka tuai ke megai nengeri tu ulih dipadu baru.

“Aku andal enggau pengawa Kepala Menteri, rayat Sarawak deka meri sukung ngagai GPS,” ku iya.

Iya nyemetak madah, maya pengawa bepilih besai nengeri ila, Bersatu deka nentuka GPS ulih menang besai.

Tambah mega ku iya, pemanah kaul entara Perintah PN enggau GPS endang chunto pemadu manah entara Perintah Besai enggau Nengeri.

Ungkup penemu, timpuh Dun Sarawak deka abis kena June tu ila lalu nya deka ngujungka pengawa bepilih nengeri ulih diatur.

Perintah Sarawak diatur dipegai GPS lalu diarika empat komponen parti iya nya Parti Pekasa Bumiputera Bersatu (PBB) Parti Sa’ati Rayat Sarawak (SUPP), Parti Rayat Sarawak (PRS) enggau Parti Demokratik Prograsif (PDP).

Dapatkan kandungan menarik kami di media sosial:
Klik Di Sini -->> Facebook | Tiktok | InstagramYoutube | |  Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak