Pengasai ati dikunsi Dewi enggau Edward nyerumba Bulan Caesarean Sedunya

Bulan April kebendar diangkat nyadi Bulan Ngingatka Caesarean Sedunya iya nya pengawa beputung ba raban orang indu ke enda ulih ngadaka anak nengah chara normal.

Nya alai, Suara Sarawak bekunsika peneleba ke diasai siku indai, Dewi Kanyan, 33 taun maya ngadaka anak keterubah enggau anak kedua iya ti bela nengah chara caesarean.

ANAK KETERUBAH

Kenu ku Dewi, anak indu iya ke tuai diberi nama Mag Eddel Audryn ada kena 4 Julai 2014, pukul 11.45 pagi enggau berat manggai 3.29 kilogram.

“Enti nitihka taga lutur anak keterubah aku nya patut iya ada kena 28 June 2014.

BELA ADA CAESAREAN…Mag Eddel (kanan) ngabas madi iya, Mag Angel ti ada kena 12 Januari 2021.

“Udah nya, lutur madah enti udah lebih lapan hari anak dalam perut nadai sebarang kelai deka pansut, aku diasuh nganjung diri ke sepital ungkup proses ‘induce’ (beranak pejal) dalam bilik beputung orang beranak.

“Kena pagi 1 Julai 2014 enda memukai aku udah pechah ai ketumban ke chukup mayuh tang aku nadai ngasaika diri muat deka beranak. Semalam-malam nya aku tumpah ai ketumban.

“Hari siti, kena 2 Julai 2014 laki aku terus mai ke sepital laban nangika pekara enda disadang nyadi ngagai anak kami duai sereta ngambaka nya kelai aku nyau deka beranak laban ai ketumban lalu nadai ngetu pansut.

“Datai ba Sepital Daro, aku terus ditabanka sida ngagai Sepital Sibu laban nyau kepuas lutur meresa sida beratika nadai sebarang buka taja 1 cm.

“Ba rantau jalai ari Sepital Daro ke Sepital Sibu, dia aku udah berengkah nyabak… bemacham pekara dirunding.

Dewi (kiba) enggau anak tuai iya, Mag Eddel.

“Datai ba Sepital Sibu…aku terus dibai ke wad emejensi. Dia lutur meresa baru, agi nadai sebarang buka.

“Malam nya (2 Julai 2014), nyadi malam keterubah dipasuk ba Sepital Sibu.

“Kena 3 Julai 2014, lutur udah berengkah ngujika proses induce. Tang agi nadai sebarang kelai pedis tauka muat deka beranak…asil peresa lutur semina bisi buka 1 cm.

“Pagi 4 Julai 2014, aku diberi induce ti kedua. Lepas nya agi ga nadai kelai muat deka beranak.

“Tang sebedau nya, lutur udah dulu mesan, enti induce kedua tu agi nadai sebarang buka tauka muat pedis, dia lutur deka meri induce ti ketiga lalu ngundan ubat ke lebit kuat. Aku semina nganggukka pala.

“Jam nunjukka pukul 9.30 pagi, misi enda memukai datai madah aku deka beputung emejensi laban nangika ‘baby’ dalam perut kurang ai enggau tau nganu nyawa baby.

“Maya nya semina Tuhan aja nemu baka ni pengasai ati aku. Asai takut, sinu, tusah ati, kesal mega bisi…tambah mega takit ninga mayuh cherita orang ke beranak caesar pedis.

“Tusah ati enggau asa mega laban juluk nyadi indai ke ulih beranak normal lesap pia aja.

“Udah nya, misi ngasuh aku ngirup ai garam sereta ngasuh aku nukar gari enggau nyikap diri ngagai bilik beputung. Maya nya, aku endang enda ngetu nyabak.

“Datai ba bilik beputung…penyelap bilik nyau asai dalam peti ais. Jari aku nyau gegetar chelap lebuh ke sain surat pemendar beranak chara caesarean.

“Lutur lalu nerang ari A ‘to’ Z aku semina nyaut ‘iya’ ke aja. Maya pakar bius meri tuchuk ‘epidural’. Fuhhh.. Pemedis iya, mina Tuhan aja mih nemu. Enda lama udah nya, ari begian perut nyentuk ke kaki berasai tepenat.

“Udah nya sida lalu berengkah bejalaika pengawa beputung. Terubah iya berasai takut…tang maya lutur udah mutung lapis siti ngagai lapis siti nadai berasai pedis, aku pan berasai lantang.

“Semina perut aja ke berasai digusak balat maya sida nguji ngatung anak. Pengudah ninga sabak anak, dia mih pemadu pengaga ati laban nemu diri udah diberi Tuhan anugerah ke chukup berega.

“Enda berasai labuh ai mata siku indai maya ngerenkunka anak asie ti baru ada ke dunya,” ku Dewi.

INFO GRAFIK

ANAK KEDUA

Nampung cherita iya baru, Dewi madahka anak iya ke lumur dua mega indu benama Mag Angel Abigail.

“Angel aku ada kena 12 Januari 2021. Enti nitihka taga lutur haribulan iya patut ada kena 20 Januari 2021 tang enda datai ba haribulan nya.

“Ungkup anak kedua tu niat di ati aku sigi deka beranak normal. Tang lebuh berunding enggau mendingka penemu lutur dia aku ngaga pemutus beranak chara caesarean.

“Aku nyau berunding milih chara caesarean laban takut baby besai sereta gagit deka nyambut anak kedua pengudah enam taun 6 bulan nganti orang baru (anak), chukup lama.

“Ungkup kedua kali caesarean tu aku endang udah sedia ari segi pengering tubuh enggau pikir.

“Asai kesal enggau takut nya tetap bisi tang enda asai takut baka ngadaka anak keterubah suba laban aku udah bisi peneleba.

“Tambah mega serak tu laki aku bisi ngulu ba tisi berengkah hari keterubah betemu lutur beperesa nyentuk masuk bilik beputung endur beranak laki bisi ngimbai ba tisi seraya meri jaku peransang.
“Baka ke endang udah ditemu, pemedis diberi ubat pemenat ‘epidural’ endang chukup pedis nadai alai nyema.

“Udah tembu proses beputung baru nadai ngasaika sebarang pemedis. Enda berasai nyau ninga nyawa anak nyabak. Baby udah ada…berasai beterima kasih amat. Anak ada meruan.

“Anak aku ti kedua ada pukul 10.45 pagi berat manggai 2.99 kilogram sereta gerai. Puji Tuhan,” ku iya bekunsika pengaga ati diri.

TERIMA KASIH TUHAN

Udah nya, Suara Sarawak ngerandau laki Dewi, Edward Geranja Ellie, 34 taun bekaul enggau peneleba iya ngemata bini beranak caesarean.

“Sebedau bekunsika pengasai ati diri, dulu aku meri terima kasih ngagai Tuhan ke pemeri ke chukup berega diatu aku udah bisi dua iku anak. Kededua nya bela indu.

“Ba pengada anak aku ketuai 2014 suba maya nya, aku enda meda lutur mutung biniku tang semina nganti ba luar wad beputung.

“Dia ati enda nemu asai, irau bisi…kesal bisi lalu enda nemu utai dikereja tak semina besampi dalam ati aja.

“Tang semua nya berubah ngagai pengaga ti enda alah kira lebuh indu misi ngena penyurung mai anak aku pansut ari bilik beputung.

“Enda berasai nitik ai mata meda gamal tudah anak aku ke tuai. Jaku aku kediri… terima kasih Tuhan, terima kasih lutur enggau terima kasih misi. Maya misi madah bini aku selamat…dia aku sekali agi gaga.

“Nyadi lebuh bini aku ngadaka anak aku ke lumur dua kena 12 Januari taun tu tadi.

“Aku chukup benasit ulih meda enggau mata diri empu bala lutur enggau misi bejalaika pengawa beputung tauka ngatung anak aku ari perut.

“Sebedau nya, endang udah dikerandau kami duai melaki bini mutus ati beranak ngena chara caesarean.

“Genap pemedis diasaika bini aku maya nya sigi dipeda magang. Berengkah ari bini dipasukka lutur hos sebedau deka masuk bilik beputung…dia ati aku berengkah kesal sereta jantung bedegup laju.

“Udah bini aku dibai bala misi tama ke bilik beputung, aku pan diasuh nitih dudi pengudah ngerasuk ke gari khas sebedau tama bilik beputung.

“Tak chelap asai tanchut enggau baju sepi aku bai ati kesal. Pengudah aku tama bilik, dia aku meda semua kereban dikena beputung endnag udah disedia magang.

“Bini aku maya nya sigi udah gali ba katil. Aku meda lutur enggau tiga iku indu misi udah sedia. Siku lelaki baka ke jaga jam. Aku lalu ngansak sesemak ngagai katil megai kuyu bini aku lalu besampi minta Petara ngemuntangka semua pengawa.

“Maya bini udah bepun beputung, aku sempat ngerakam lutur melah perut bini aku…akai… nyau kekelau asai dada meda pengawa bala lutur. Ni ke bau rum kitai mensia…asap baka leaser dikena lutur mutung.

“Udah nya, lutur malik ngagai aku. Iya lalu nunjukka pala anak sereta narit anak aku pansut.

“Pengudah anak mujur dikatung lalu ditunggingka iya. Dia bisi utai disedut ba idung anak engka muai ai.

“Enda lama udah nya dinga aku nyawa anak terus ngekal nyabak. Aku lalu terus nyambut lalu merap iya.

“Udah nya, aku merap indu misi kelai terima kasih lalu nyuaka aku ngagai iya laban sida deka ngaduka temuni.

“Sepengudah anak aku dibai misi, bala lutur nyambung baru pengawa nyedut darah ba perut bini aku. Amat tak nyau geremai bulu pegu meda…Aku meda sida nyait nyentukka pengawa nya tembu.
“Udah nya, aku ngelawa belakang bini aku lalu kami duai lalu bsampi… enda lama udah nya misi nganjung anak kami duai ke udah tembu dibalut sereta diberesi bala misi.

“Taja pengawa nya nyata dipeda aku chukup pedis tang bini aku agi dapat mandangka tuchum ti pemadu manis.

“Nya mih lansa kenang aku ke ulih dikunsi ngagai kitai lelaki pengasai ati maya nguluka bini beranak beputung bisi nya asai deka tekemi, kesal, takut, semua endang dia magang.

“Nya alai, siruka mih ke bini enggau anak kitai lalu ibuh mih ke sida enggau penuh kasih sereta penyayau seagi kitai diberi Petara peluang begulai di dunya,” ku Edward ke mega gawa nyadi pemberita sebuah ejensi berita di menua tu.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak