Pengawa ngaku ‘wilayah’ anang semina jaku aja

KUCHING: Bala tuai di Sarawak ngelaluka pengawa ngaku wilayah diberi ngagai Bumi Kenyalang tu, tang iya nyemetak madah nya anang semina jaku aja tang mesti ditentuka enggau terang nengah ubah Konstitusyen Perintah Besai.

Kaban Parlimen Santubong Datuk Seri Wan Junaidi Tuanku Jaafar madah pengawa ngaku status Sarawak patut bepelasarka lima dokumen aja iya nya Ripot Suruhanjaya Cobbold, Sempekat Malaysia 1963 (MA63), Ripot Entara Perintah (IGC), Akta Malaysia (UK) enggau Akta Malaysia (Tanah Melayu) sereta Konstitusyen Perintah Besai Malaysia.

“Ukai berandau, bebalas surat tauka peragam tang lima dokumen…sebarang aja utai ba luar lima dokumen tu endang ukai sebagi ari dokumen ke disetuju ungkup MA63.

“Nyema Perintah Besai sedia nulis baru MA63 enggau semua empat dokumen bekaul, aku sigi nyukung penuh tang Konstitusyen Perintah besai mesti diadu manah enggau diubah nitihka pematut,” ku iya madah nengah sebengkah penerang, kemari.

Nya alai, Wan Junaidi ke mega Menteri Pemansang Dagang enggau Gerempung Kerejasama setuju enggau penemu Kepala Menteri Datuk Patinggi Abang Johari Tun Openg ti nyerahka pekara nya ngagai orang tebangkar runding ba undang-undang nentuka leka jaku wilayah ungkup Sarawak, diatu benung diperunding nengah MA63.

“Nyema bisi orang bedau macha enggau meretika lima dokumen bekaul, manah agi diau diri,” ku iya.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak