Program opis perintah ditangguh dua minggu

KUCHING: Semua program ti udah dalam taga ngambika diatur ba menua tu nyengkaum program ti ngaul Kepala Menteri Datuk Patinggi Abang Johari Tun Openg deka ditangguhka sepengelama dua minggu berengkah 17 April (kemari).

Gerah nya dipansutka Sekretari Perintah Nengeri Datuk Amar Jaul Samion dalam surat kena 16 haribulan April ngagai semua sekretari mendam opis menteri, residen bagi menua, tuai opis nengeri enggau sekretari kaunsil kandang menua nengeri.

Ku penerang nya, pekara nya dipansutka berindik ari gerah Komiti Penyangga Penusah Ngenyit Nengeri (JPBN) ungkup semua pengereja pengawa nengeri Sarawak kena 15 April tu tadi.

Entara gerah nya semua aum betemu mua enda ulih diatur dalam timpuh dua minggu, taja pia aum dalam tali arus nengah aplikasyen baka zoom agi ulih diteruska.

Gerah tu mega madahka sebarang pejalai ke luar pelilih menua enda dikemendarka enti nadai kebuah ti besai enggau mesti bisi pemandar ari tuai opis dalam timpuh ti sebaka.

Kena 15 April, Chairman JPBN Datuk Amar Douglas Uggah Embas madahka semua aum betungga mua enda deka dipejalaika sepengelama dua minggu berengkah Hari Satu.

Iya mega madahka semua program ditangguhka dalam timpuh ti sebaka.

Pekara nya dipadahka berindik ari kes berampit Covid-19 di menua tu ti nyau deka ngerikodka empat angka kena Hari Lima tu tadi iya nya 960 kes, rikod pemadu tinggi kala dirikodka kenyau pandemik tu nuntung menua bulan Mac 2020.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak