Rikod pemadu mayuh, 960 kes dirampit Covid di Sarawak

KUCHING: Sarawak ngerikodka kes baru positif Covid-19 pemadu mayuh iya nya 960 kes kemari ngujungka kes positif ketegal Covid-19 di menua tu nambah 22,920 kes.

Chairman Komiti Penyangga Penusah Ngenyit Nengeri (JPBN) Datuk Amar Douglas Uggah Embas madahka, 896 tauka 93 peratus ari kes baru tu datai ari orang ti endang udah dikuarantin.

“Pelilih Menua Kuching ngerikodka 370 kes ke alai 313 kes datai ari Palan Pematih Polis.

“Kelimpah ari nya, Pelilih Menua Mukah ngerikodka 103 kes ke alai 99 kes datai ari Politeknik Mukah (Kluster Jalan Bambangan, Mukah),” ku iya.

Uggah bejaku munyi nya ba aum pemberita Covid-19 di Dun Lama ditu, kemari.

Tandu iya, ari 960 kes baru tu, semina 60 iku nunjukka kelai dirampit Covid-19 maya beperesa.

“Kes baru positif ti bukai iya nya di Pelilih Menua Bintulu (175), Sibu (100), Miri (83), Kapit (24), Belaga (20), Bukit Mabong (13), Serian (9), Selangau (7), Kanowit (6), Sebauh (5), Subis (5), Tatau (5), Marudi (5), Kabong (4), Sri Aman (4), Song (3), Lubok Antu (3), Betong (3), Samarahan (3), Matu (3), Daro (2), Bau (2), Beluru (1), Sarikei (1) enggau Tanjung Manis (1).

“Aku minta ngambika raban pengatur ba palan latih neritka Atur Pengawa Standard (SOP) ti udah disediaka laban kes baru tu nambah ketegal nadai nitihka SOP,” ku iya.

Berebak enggau nya, iya madahka tiga kluster dirikodka udah punas kemari ketegal nadai ngerikodka sebarang kes positif baru dalam timpuh 28 hari.

Kluster ti punas tu iya nya Kluster Melor, Pusa, Kluster Jalan Main Bazaar, Sri Aman enggau Kluster Kiba, Sibu.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak