SPEKA minta diberi agih ba dagang minyak enggau gis

KUCHING: Gerempung Kunteriktor Petroleum Sarawak (SPEKA) ngarapka Perintah Sarawak meri peluang ngagai sida awakka ulih ngambi bagi dalam pengawa ngatur minyak enggau gis di menua tu.

Chairman SPEKA Datuk Rahman Lariwoo madahka 10 buah kompeni ti bejalaika dagang minyak enggau gis nengah gerempung nya udah berakup numbuhka sebuah konsortium begulai.

“Sehari tu (kemari) konsortium kami udah nyain sempekat enggau kompeni ari menua Korea (nengah chara virtual) iya nya Pasific Ocean Marin Industry Corporation Ltd, PMC Corporation Ltd sereta KHPT Corporation Ltd.

“Nengah kerejasama tu, kami ngarapka konsortium tauka raban dalam SPEKA diberi peluang ngatur dagang minyak enggau gis ba tasik Sarawak,” ku iya.

Rahman madah munyi nya ba aum media SPEKA diatur ba Jalai Pending ditu, kemari.

Berebak enggau nya, iya mega ngarapka Perintah Sarawak nengah Petros ulih mantu perambu sida dalam ngambi bagi sentang pekara tu.

“Serikat entarabansa besai baka Petronas mega patut meri peluang ngagai raban kontraktor ari Sarawak bekaul pekara minyak enggau gis.

“Kebuah pia, laban serikat kontraktor minyak enggau gis di Sarawak jauh tinggal ari kontraktor di Semenanjung Malaysia.

“Nya alai, nengah peluang Petros tu, kami ngarapka Perintah Sarawak deka meri peluang tauka pengawa ngagai raban konsortium tu,” ku iya.

Iya mega ngarapka raban sida deka bulih pengawa ari serikat besai bekaul minyak enggau gis ke bukai.

“Kami minta peluang tauka pengawa ari semua serikat minyak enggau gis ti ngaul tasik Sarawak baka Petronas, Petros, Shell enggau ke bukai.

“Dalam pekara tu kami endang begunaka sukung ari Perintah Sarawak meri peluang nya,” ku iya.

Ungkup penerang, 10 konsortium tu iya nya serikat Dumas Holdings Sdn Bhd, Konsortium Bumi Consultants and Services, Astaka Consulting Engineers Sdn Bhd, Petro Part Sdn Bhd, Precise JV Resources Sdn Bhd, EPC Synergy Sdn Bhd, Pelangi Indah Engineering Sdn Bhd, Fastart Sdn Bhd, Bmech Construction Sdn Bhd enggau Worldbay Diversfied Sdn Bhd.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak