Standard produk digaga nitih peminta menua luar

DEBAK: Perintah Sarawak ngembuan perambu silik dikena ngerembaika rentayan asil pemansut produk ngambika genap utai tanam bala pekebun ulih dijual, ukai semina ba makit dalam menua tang mega entarabansa.

Sapit Kepala Menteri Datuk Amar Douglas Uggah Embas madah, beguna amat genap produk ke dijual nya nitihka standard pemakai ti bebida ba sesebengkah menua.

“Nya alai, Taman Betanam Betupi Saribas di Lubok Tamang dilanggur ngena pelin ‘anchor company’ – kompeni ke bisi peneleba enggau ngembuan makit ke besai.

“Ari nya, kitai deka ulih nentuka asil utai tanam ke dikemansang bala orang bumai ditu ila ulih diinjin enggau dijual terus.

“Pekara tu laban lebuh kitai deka nyual ke menua luar, nya patut nitihka atur enggau standard pemakai menua ke bekaul. Ambika chunto Singapura bisi standard sida empu, pia mega China.

“Nyadi, enti kitai ngena kompeni baru dikena nyapai tias nya tentu nguna awak ke lama, nya alai pelin ke dikena ba Tarat deka diguna ba Taman Betanam Betupi Saribas,” ku iya.

Uggah ke mega Menteri Betanam Betupi Moden, Tanah Adat enggau Pemansang Kandang Menua madah munyi nya ngagai pemberita pengudah Pengawa Nasih Tanah Kompleks Lumba Pelilih Mit ditu, kemari.

Nya alai, Taman Betanam Betupi Saribas di Lubok Tamang udah dikemendarka Perintah Sarawak ba tanah urung 2,000 hektar pemesai.

“Diatu, Opis Parit enggau Entali Ai (JPS) benung ngaduka langgur sistem parit ditu…perintah mega deka ngaga perengka guna baka jalai.

“Taba tu deka dibagi ngagai plot lalu aku meransang orang bumai patut ngambi bagi.

“Tang kitai enda meri geran ngempu ngagai sida, tu deka meri peluang ngagai rebak dudi nampung projek ditu lalu nya ulih dikena seumur idup,” ku iya.

Berebak enggau nya, Uggah madah perintah diatu benung chakah mantu aktiviti ngerembaika asil.

“Diatu maya endur kitai merambu…padang bilun ngambi awak tiga taun endur tembu.

“Dalam timpuh nya, kitai ngemansangka ladang benih di Simpang Debak, palan ngumpul, ngjinjil enggau nungkus (CPPC) di Spaoh dikemendarka ngena ungkus RM10 juta, kelimpah nusun atur sistem teknologi pemadah.

“Tu endang perambu lalu kitai ngarapka ulih mantu ngerembaika asil pemansut ngena benih pemadu baru, ngena teknologi, udah nya proses enggau kitai patut nentuka bisi anchor company – sida deka nginjin enggau ngelakuka produk.

“Nya alai, semua rentayan asil pemansut nya patut ditusun enggau manah. Aku mega minta rayat bela nyukung pengawa tu,” ku iya.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak