Tiga agi kluster baru ditemu di Sarawak

KUCHING: Opis Pengerai Nengeri Sarawak ngenukuka tiga kluster baru dirikodka kemari iya nya Kluster Jalan Disa enggau Kluster Jalan Ding Lik Kwong ba Pelilih Menua Sibu enggau Kluster Ulu Balingian ba Pelilih Menua Selangau.

Chairman Komiti Penyangga Penusah Ngenyit Nengeri (JPBN) Datuk Amar Douglas Uggah Embas madahka Kluster Jalan Disa, Sibu ngaul sebuah komuniti sekula pengarap di Jalai Disa Sibu.

“Kes indeks tu datai ari siku indu beumur 28 taun ti beperesa di Klinik Pengerai Lanang kena 13 April tu tadi.

“Kes tu siku pengajar ba sekula primari nya ti berengkah nunjukka kelai dirampit kena 9 April lalu iya kala neresa zon ke Pelilih Menua Kabong, Betong,” ku iya dalam aum pemberita Covid-19 di Dun Lama ditu, kemari.

Kelimpah ari nya, Kluster Jalan Ding Lik Kwong, Sibu ditemu ngaul sebuah serikat industri kayu di Teku Sibu.

“Kes indeks tu mega siku indu beumur 28 taun ti beperesa ba sebuah klinik peribit kena 12 April lalu ditemu positif Covid-19 kena 13 April.

“Kes tu kala bejalai neresa zon kena 1 ngagai 4 April ngagai Pelilih Menua Sarikei,” ku iya.

Ku Uggah, Kluster Ulu Balingian, Selangau ditemu ngaul sebuah komuniti sekula sekondari enggau genturung pendiau di Ulu Balingian, Selangau.

“Kes tu datai ari siku nembiak sekula beumur 16 taun ti beperesa ba Klinik Pengerai Selangau kena 13 April laban bisi nunjukka kelai kena rampit.

“Iya ditukuka positif Covid-19 kena 16 April,” ku iya.

Berebak enggau nya, Uggah madahka Pelilih Menua Selangau bebali ari status oren ngagai mirah kemari pengudah ngerikodka 128 kes berampit dalam timpuh 14 hari ngujungka penyampau pelilih menua ba status mirah bisi 16 buah.

“Pelilih Menua Betong enggau Asajaya bebali ari status kuning ngagai oren laban udah ngerikodka 22 enggau 21 kes berampit dalam timpuh 14 hari.

“Pia mega, Pelilih Menua Bau bebali pulai ari status oren ngagai kuning kemari pengudah semina ngerikodka 12 kes berampit dalam timpuh 14 hari,” ku iya


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak