Tuah ‘Kampungku

KUALA LUMPUR: Miss Universe Malaysia 2020, Francisca Luhong James narit ati mensia mayuh lebuh mandangka pekayan digela ‘Kampungku’ National Costume enggau Evening Gown ba Vogue Lounge, Kuala Lumpur.

Indu penakan Iban, Kayan enggau Kenyah tu deka mantaika penyelai budaya Malaysia kelebih agi Sarawak ba mata dunya maya Pekit Miss Universe Ke-69 ba Hollywood, Florida di United States (US) kena 16 Mei tu (17 Mei, jam Malaysia).

Nitihka penerang ari Miss Universe Malaysia Organization (MUMO), pekayan dikumbai ‘Kampungku’ National Costume nya diasilka siku penengkebang pisin tebilang benama Carven Ong seraya agum ba atas pala Francisca nya digaga Wesley Hilton of Borneo Doll.

Pekayan pemerat 45 kilogram (kg) nya mandangka rumah ‘kampung’ digaga ngena chura burak enggau chelum dikena nganding gaun batik dikena Francisca.

Baju dikena Francisca nya diambi ari pisin pua kumbu lalu bisi mega pisin Orang Ulu enggau batik Melayu. Baju batik tu mega bisi dilekat baka gamal ensikal ba atas pala iya mandangka pengidup nembiak kelia sebedau jeman moden diatu.

BAJIK… Baju gaun dikena Francisca tu mandangka jerita tuai Puteri Sejinjang lalu baju tu ditengkebang Rizman Ruzaini.

Pia mega, gaya pengidup kelia mega bisi ditambah enggau gambar manuk sereta pun nyiur ngambi mulaika kenang pengidup ba menua.

Baju gaun dikena Francisca mega tampak nyelai lebuh ditambah enggau manik kerawang ba lengan iya dikena ngayanka penatai asal Francisca.

Dikena nambahka pemanah gaun dikena iya, ba pala Francisca bisi dilagu ngena agum dikumbai ‘Francisca’ ari Borneo Doll seraya jari iya bisi dilekat tikai mengkuang enggau bungai kenunsung ngayanka budaya Malaysia.

Ungkup penerang, Carven Ong nya siku penengkebang pisin ken gaga baju ‘Peranakan Indulgence’ National Costume dikena Miss Universe Malaysia 2019, Shweta Sekhon lalu pekayan nya udah narit ati mensia mayuh ba serata dunya.

Evening gown dikena Francisca nya ditengkebang siku penengkebang pisin tebilang Malaysia benama Rizman Ruzaini ari jerita tuai Puteri Sejinjang ke tebilang di Sarawak.

Baju bechura biru puda nya ditengkebang bepelasarka jerita Puteri Sejinjang mali nyadi pulau.

Antin enggau kalai pirak dikena Francisca nya ngayanka pemajik enggau pemerani iya lebuh bejalai ba atas panggau.

Miss Universe Malaysia Organization udah bekerejasama enggau bala bukai sekumbang pejalai Miss Universe Malaysia 2020 baka Carven Ong, Rizman Ruzaini, Secrets of Nature, Habib, Jeeves, Shawn Cutler, Amber Chia Academy enggau Vogue Lounge.

Kelimpah ari nya, MUMO mega meri terima kasih ngagai sida ke udah meri kerejasama ngelama tu baka Borneo Doll by Wesley Hilton, Packaging Mart, Babel, Esteem Dental, Glojas Smart International Aesthetics, Esthetics International Group (EIG) – Dermalogica & Tisserand, Strip – Ministry of Waxing enggau La Jung Aesthetic Clinic.

Mensia mayuh dilalau meri sukung ngagai Francisca lalu ngundi iya ngambi masuk ngagai Top 21 ba Pekit Miss Universe Ke-69, kita tau ngembuan aplikasyen Miss Universe lalu ngundi iya diatu.

Kita mega tau meda gambar Francisca ngena National Costume enggau Evening Gown ba website http://bit.ly/MUM2020NationalCostume.

Penerang silik pasal Miss Universe Malaysia tu, kita tau meda ba website www.mumo.com.my, Facebook MissUniverseMalaysia, , Twitter @MissUniverseMY enggau Instagram missuniversemalaysia.

INDU DAYAK… Francisca udah nempa sejarah ngangkatka budaya Malaysia kelebih agi Sarawak.

 

NGANGKATKA BUDAYA… Baju batik dikena Francisca tu ngayanka ukir pua kumbu enggau kain batik Malaysia.

Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak