70,000 nembiak di Sibu apin rejister nerima vaksin

SIBU: Dipelabaka urung 70,000 raban nembiak ditu bedau ngerejister diri ba Program Imunisasyen COVID-19 Nasional.

Pekara nya dipansutka Sekretari Politik Kepala Menteri Michael Tiang maya dirandau kemari (Hari Minggu).

Beduduk ari nya, iya meransang raban lengkas ngerejister diri nerima vaksin.

Kenu ku iya ke mega Tuai Nembiak SUPP madah tu beguna amat dikena nyapai juluk ulih meri vaksinasyen 190,000 iku peranak Sibu dikena numbuhka raban genap nerima imunisasyen.

“Juluk kami di Sibu deka meri 190,000 iku nerima vaksin. Udah nya naka tu, bepelasarka penerang ke pemadu baru, kitai semina ngembuan urung 110,000 iku orang udah ngerejister diri.

“Agi bisi urung 70,000 iku raban nembiak bedau ngerejister diri naka tu,” ku iya.

Michael mega madah taja raban nembiak mayuh dipeda bayam telefon pintar tang sida bedau ngerejister diri ba aplikasi MySejahtera ungkup program nya.

“Endang amat agi mayuh nembiak bedau ngerejister diri. Nya alai aku deka meransang raban nembiak lengkas ngerejister diri.

“Kitai begunaka mayuh orang nerima vaksin awakka menua ulih pulai manah baka selama,” ku iya.

Nangkan ke nya, Michael madah proses ngerejister diri chukup mudah. Kelimpah ari nya, iya madah pom nerima vaksin mega ulih diambi ari Opis Pelilih Sibu tauka sebarang pampang SUPP ditu enti deka ngerejister diri chara manual.

Berebak enggau nya, iya ngelalau mensia mayuh anang kelalu irau enggau bansa vaksin ke dibeli perintah ari menua luar.

Ku iya, sebarang vaksin ke dibeli nya endang betuju nyeliahka kitai ari kena rampit penyakit Covid-19.

Suara Sarawak