Aram belajar kuntau enggau Sikar

KUCHING: Raban bansa Iban ti bisi ati deka belajar kuntau tau rejister masuk kelas kuntau diatur Gerempung Kuntau Iban Sarawak (Sikar).

Ku siku ari kaban gerempung nya, Guro Majakatar Blayah, madahka pom bisi diidar ngagai raban bansa Dayak ti deka belajarka seni ngetanka diri nya.

“Bayar nyadi kaban Sikar semina RM20 ungkup seumur idup lalu penerang silik bisi dikunsi ba facebook Sikar empu.

“Kelas belajarka kuntau Spring12. Taja pia, pengawa diketu dulu diatu berindik ari Atur Mindah Betagang (PKP) benung dipejalaika,” ku iya lebuh ditanya Suara Sarawak, tadi.

Majakatar madah baru, naka diatu iya udah nerima 12 iku ti deka belajar kuntau Spring12, diperambu diatur ninting minggu.

“Kami deka belatih baru udah PKP abis timpuh tauka enti nadai penanggul bukai.

“Aku ngarapka gaya menua kitai pulai baka selama ngambika kami ulih belatih baka selama,” ku iya.

Suara Sarawak