ATM , KKM negapka kerejasama napi gelumbang ketiga pandemik

KAPIT: Soladadu Malaysia (ATM) deka negapka kerejasama enggau Opis Menteri Pengerai (KKM) dalam napi gelumbang ketiga pengerekai pandemik Covid-19.

Panglima ATM Jeneral Tan Sri Affendi Buang madahka, nya nyadi komitmen ATM dalam pengawa sekunder sida nentuka pengelantang enggau pengerai rayat ti meruang dikemerat.

Ku iya, perengka logistik ninting hari mai keresa berubat mega deka diteruska ngena aset ATM nitih peminta kelebih agi nganjung nengah bilun ngaul bilun Soldadu Langit Malaysia (TUDM).

Iya mega madahka, penumbuh sepital medan ba palan bukai mega bepanggai ngagai peminta enggau pengulih ke udah bisi ti ulih disediaka Raban Servis Pengerai ATM.

Ku Affendi, Sepital Tambah ATM Kapit nya sepital kedua ditumbuhka pengudah pemujur sepital ke sebaka ba Tawau, Sabah.

Ku iya, servis Pengerai ATM nengah Kor Pengerai Diraja (KKD) udah ngatur raban enggau keresa Sepital Tambah ATM kapit kena 6 Mei tu tadi.

“Nengah atur tim Batalion Keterubah Berubat ba pengkalan Kem Muara Tuang, Kota Samarahan enggau kerejasama Opis Pengerai Nengeri Sarawak sereta Sepital Kapit, sepital medan tu ngembuan tanggungpengawa nyendiaka servis ngubat ngagai pesakit bukai kelimpah kes Covid-19.

“Sepital tu ngembuan kapasiti 40 buah katil disikap enggau keresa wad, farmasi, x-ray enggau bilik berubat ngenyit,” ku iya.

Iya bejaku munyi nya rambau ngelawa Sepital Medan ATM Kapit kemari ti udah berengkah kenyau 10 Mei tu tadi ba Balai Mensia Mayuh Melayu, Kapit.

Affendi madahka, nengah perengkaguna ti disediaka tu, nya deka ngemuntangka Sepital Kapit meri perati ngagai servis ngubat kes Covid-19 enggau ngembuan penyampau katil ti chukup ungkup kes nya.

Ku iya, kenyau hari keterubah nerima pesakit kena 10 Mei nyentuk 14 Mei bisi tujuh iku peskit udah diengkah ba sepital nya ke alai siku ari sida udah dikemendarka pansut.

Tandu iya, sepital medan nya dibuka 24 jam sehari, sepengelama tujuh hari enggau nyendiaka servis ngubat nyengkaum servis ngubat pesakit (12 jam sehari nitih shif pengereja klinik) enggau servis ba begian pengatur sereta sukung (jam 7 pagi nyentuk 4 lemai).

“Naka diatu, kes beputung bedau agi dipejalaika ba sepital nya. Taja pia, sepital tu deka ditambah enggau servis balai beputung enggau unit sakit raya (ICU) enti bisi peminta,” ku iya.

Naka diatu, ATM udah ngengkahka enam pemesai nyengkaum Lt Kolonel Dr Saiful Anuar Ju @ Ju Ahmad nyadi Komander Sepital Medan nya.

Penyampau pemesai tu iya nya tiga iku Pemesai Berubat, siku Pemesai Kereja Khas, siku Pengereja Pengawa enggau 53 raban ke diarika 32 paramedik enggau 21 iku raban servis sukung. Kelimpah ari nya KKM diarika 10 iku indu misi enggau enam iku raban servis sukung.

Sama bisi datai Panglima Soldadu Darat, Jeneral Tan Sri Datuk Zamrose Mohd Zain, Tuai Direktor Servis Pengerai ATM, Leftenan Jeneral Datuk Dr Zulkeffeli Mat Jusoh, Panglima Medan Timur Tentera Darat, Leftenan Jeneral Datuk Mardzuki Muhammad enggau Panglima 1 Divisyen, Mejar Jeneral Datuk Dzulkafli Mustaffa.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak