Bejejaga ba endur ke suah bah

MARUDI: Peranak ke diau ba genturung ke suah kena penusah bah nyengkaum pelilih menua Marudi dilalau bejejaga sereta nyikap diri napi penusah bah.

Menteri Muda Kaunsil Kandang Menua enggau Pengawa Berumah ti mega Adun Marudi Datuk Dr Penguang Manggil madahka ujan bangat ba ulu kena Hari Empat tu tadi udah ngasuh genturung pendiau di Mulu bah.

“Ai ari ulu udah mansang ngasuh Long Lama nyengkaum Kampung Benawa enggau Long Maro ditiki ai.

“Nya alai, aku ngelalau peranak kampung enggau rumah panjai di genturung nya ngambika bejejaga sereta nyikap diri napi penusah bah sebarang maya,” ku iya dalam penerang di laman facebook, kemari.

Tandu iya, peranak kampung enggau rumah panjai mega dipinta ngambika seruran ninga lalau ari Opis Pelilih Menua enggau Komiti Penyangga Penusah Pelilih Menua sida.

Kemari, sekeda palan di Long Lama ampuh bah peninggi empat kaki.

Gaya penusah bah ke nyadi di Long Lama enggau Kampung Benawa, kemari.

Suara Sarawak