‘Durian Kimchi’ patut jera enggau penyalah diri

KUCHING: Menteri Dagang Temuai, Seni enggau Main Asal, Datuk Seri Nancy Shukri ngelalau raban pengemeran media rama patut jera tauka nesal ati enggau penyalah ke dikereja diri pengudah sida minta ampun.

Iya mansutka jaku lalau nya lebuh ngenang ulah siku lelaki benama Ryzal Ibrahim tauka Durian Kimchi ke ngumbai ngepan asal bansa Iban nya gari utai.

“Ulah iya tu ke balat ngemaruhka adat asal bansa Iban enda patut diterima lalu tu patut nyadi teladan ngagai orang bukai ngambi enda riri ngereja ulah baka nya.

“Menua Malaysia diuan pupu bansa ti ngemeranka mayuh budaya, adat enggau main asal nyengkaum pekayan asal.

“Kitai semua patut temegah laban bisi budaya bebida laban tu ke ngasuh kitai nyelai sereta nyulut,” ku iya.

Ba klip Instagram Stories, Ryzal nyebut jaku ti ngeleseka ngepan Iban ti dikena bini iya ke asal ari Korea benama Maryam You Narae.

Iya nyebut kain ti dikena indu nya baka selap mija enggau tikai nyengkaum ngumbai gari utai.

Video nya udah dipadam lalu Ryzal udah minta ampun ke pengilap diri empu.

Taja pia, penguna media rama kelebih agi bansa Iban ke meda video nya balat enda lantang ati sereta mantaika pengeringat diri.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak