Filem Belaban Hidup: Budaya Borneo dikelala dunya

KUCHING: Filem Belaban Hidup: Infeksi Zombie menang baru dua iti anugerah iya nya Anugerah filem Toronto (kategori Anugerah Khas) enggau Anugerah Sinematografi Asia (Filem Pemadu Manah).

Pemujur filem tu ke udah menang 13 bengkah anugerah mandangka filem Dayak mega ulih diterima sereta seikas filem bukai ba tikas entarabansa.

Filem Belaban Hidup tu mega patut dipuji laban udah mandangka budaya kitai di Borneo ngambi dikelala ba serata dunya.

Nya alai, Suara Sarawak bisi ngerandau mensia mayuh bekaul enggau pemujur Filem Dayak keterubah tu.

Ba penemu siku penanyi Iban Lucy Mapang laban ke nyadi anak Dayak, iya berasa chukup temegah ati enggau pemujur Misha Minut Panggau enggau Ray Lee laban udah ngaga Filem Belaban Hidup tu ngujungka filem tu nerima mayuh anugerah ari menua bukai.

LUCY M

“Tu mandangka filem kitai Dayak ukai semina ulih diterima dalam industri filem tu empu tang mega ulih diterima industri filem ba renggat entarabansa.

“Pemujur filem tu deka ngerandang jalai industri menua mandangka budaya enggau gaya pengidup kitai di Malaysia kelebih agi ba Sarawak ngagai mensia ba serata dunya.

“Ari nya tadi, peranak ba menua luar deka rindu belajarka jaku Iban enggau beratika budaya kitai. Utai ke balat ngasuh aku temegah ati nya anak Dayak pen bisi pengelandik sereta penau ngaga filem pemadu manah seikas filem bukai di menua luar.

Nya alai, aku ngarapka udah tu mayuh agi Filem Dayak ke bukai ulih digaga ngambi budaya kitai majak dikelala orang ari menua bukai. Sekali agi, meri pengaga ati ngagai Misha Minut Panggau enggau Ray Lee,” ku iya.

Nangkan nya, siku orang dagang Cecelia Lagak madah diri chukup gaga meda pemujur filem Dayak keterubah tu nerima mayuh anugerah.

“Pemujur tu mega udah meri pengelebih dikena mantaika gaya pengidup kitai ngagai serata dunya. Aku ngarapka mayuh agi bala produser filem deka mantaika filem bekaul pengidup enggau adat kitai di menua tu.

“Pengawa ngaga filem bepelasarka budaya mega deka nentuka pekara nya enda lenyau disegang arus pemansang. Nambahka nya, filem tu mega deka nentuka rebak dudi nemu adat enggau budaya kitai diatu kelebih agi maya

CECELIA LAGAK

dunya nyau makin moden diatu,” ku iya

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak