Lagu baru Eyqa Saiful: Merinsa enda pulai Gawai

Aka Dambai Production (ADP) ti bepalan di Kuching udah ngeluarka dua buah lagu disadaka penanyi tebilang Eyqa Saiful (Merinsa Enda Pulai Gawai) enggau Joget Ketegal Covid disadaka raban penanyi ti ngelar diri enggau nama Raban Sada Timang Sebana.

Nyerita ngelansa pasal lagu Joget Ketegal Covid ari Raban Sada Timang Sebana,Jesley madahka buah penemu dikena ngaga lagu tu datai pengudah kepuas ninga serebana ari bala penanyi lagu tu empu ti seruran besebana ketegal enda ulih pulai ke menua sama ngintu Gawai Dayak enggau diri sebilik ketegal penyadi igi penyakit Covid 19 ti majak ngerekai.

“Berindik ari ti selalu mantaika serebana ati ti sinu tu mega ngujungka nama raban sida digelar Raban Sada Timang Serebana.

“Nya alai,ba video klip lagu tu bala penanyi nadai bekenaka ngepan kitai Iban tang semina ngena gari penulu tauka gari ti suah dikena ninting hari.

“Video klip lagu Joget Ketegal Covid tu bisi nyelai mimit ari video lagu Gawai bukai.

LOGO Aka Dambai Production.

“Kebuah pia, laban sida endang diasuh ngena gari penulu baka ke nurun gawa kelimpah ditambah enggau belakun mimit dikena mandangka diri enda pulai ngintu Gawai sereta ngambika peminat ulih mega meretika genap leka lagu tu enggau nyentuk agi,”ku iya.

Jesley ke mega penengkebang mayuh lagu tebilang Iban madah diri bisi betapi enggau pemar mimit maya ngerikod lagu tu taja mujur tembu ba timpuh pandak iya nya sebulan aja.

“Meri terima kasih nuju semua lebih agi bala artis,Pengatur Muzik Cami Tan,Penyanding Penemu ADP,Matthius Mambang Bajang sereta Ricky Ribot ti udah sama kiruh nyaup ngaga projek lagu Gawai baka ke taun tu.

“Orang ti dulu mungkal tegalan dulu mega nugal enggau ngetau sereta dulu mega teulihka asil ari umai sida.

“Tang ungkup orang ti baru manggul baka kami sebuat tu tetap mupuk bekayuh nyingkang belubah nitih ari belakang sema baka enda tegar belanda bulung bejalai,enda dapat nyingkang biar ngerayap asal mih ulih sama sangkai ba adan.

“Ngarapka Aka Dambai Production nerima sukung tegut nadai bebagi ari peminat industri muzik lagu Iban jemah.

“Meri Selamat Ngintu Gawai Dayak 2021 nuju peminat ti enda leju nyukung ngelama tu lebih agi ngagai Ruai Suara Sarawak ti seruran enda leju nadai beleman dalam ngeluarka berita dunya pemerindang ngelama tu,”ku iya.

Ungkup penerang,nama Aka Dambai Production diambi beserimbai enggau nama Band Aka Dambai ti ditumbuhka taun 2001 iya nya band keterubah lalu nyadika pelasar Jesley enggau Matthius ngerembai lalu bejalaika pengawa merindang ngelama tu lalu sekumbang nya kala mega bekerejasama enggau penanyi Aki Manang nengah Album Kompilasyen ba taun 2007.

Kededua lagu tu udah ulih dipeda ba Laman Rasmi Youtube Aka Dambai Production.

Raban Sada Timang Sebana

 

TUAI ADP…Jesley Jabu Bajang

 

Matthius Mambang Bajang

Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak