Lansa kenang siku pengajar Kelabit ari Bario, Lucy Bulan

Ingatka pemerinsa diri enggau mar lebuh nurun sekula kelia, pengajar Lucy Bulan mutus ati pulai ke Bario lalu ngajar sereta nyadi prinsipal di Sekula Sekondari (SMK) Bario iya nya menua asal iya empu.

Dalam siti program Oh My English di youtube, Lucy nyadi malin anak bansa Kelabit keterubah nyadi prinsipal di sekula nya.

“Lebuh umur enam taun, aku nurun sekula bedarat semilan batu ari Bario.

“Ninting Hari Minggu bedarat ke sekula lalu ninting Hari Lima kami pulai ke rumah,” ku iya bejaku dalam program nya.

Ku Lucy, sida bedarat sepengelama empat jam lalu mai bekal pemakai kediri empu.

Apai enggau indai Lucy.

“Apai enggau indai aku endang bansa Kelabit lalu kami udah lama diau ba Bario.

“Seduai endang nadai besekula, tang seduai iya nemu sentang pemesai guna pelajar ungkup pengidup jemah,” ku iya.

KENANG MANIS

Tandu Lucy, lebuh umur iya manggai 12 taun, iya mindah ngagai sekula sekondari di Marudi.

“Aku ninggalka menua sepengelama lima taun lalu semina pulai ke menua setaun sekali.

“Lebuh pulai ke Bario, kami nadai jalai bukai semina numpang sebuah bilun mit laban menua aku sigi jauh.

“Dalam pelajar, aku meda bansa Kelabit manah dalam pelajar taja besemekih enggau bansa bukai baka bansa Kayan, Kenyah, Iban enggau ke bukai,” ku iya.

Udah tembu belajar degree ba Universiti Malaya ba bidang Seni, Lucy ngajar ba Kuching sepengelama 20 taun sebedau nyambung sekula ngagai New Zealand ngambi Master dalam bidang pelajar.

Gambar lama bansa Kelabit di Bario kelia.

“Udah aku tembu ngambi master, aku minta ngagai Direktor Opis Pelajar deka pulai ke Bario gawa din urung taun 1997.

“Maya nya, Bario semina bisi sebuah sekula aja iya nya SMK Bario.

“Lebuh agi mit, apai indai aku kala bejaku ngasuh aku belajar bebendar ngulihka pemandai, udah pandai pulai ke menua ngemansangka bansa kami empu,” ku iya.

Lucy lalu nyadi prinsipal ba SMK Bario iya nya sebuah sekula bemalam.

“Suah kami napi suntuk bekal pemakai lalu aku empu kala meda nembiak ngiga sayur babas ngambika ulih disumai kelimpah ngiga kayu api.

Gambar rampa sekula SMK Bario.

“Nembiak ti sekula ditu bisi ti bedarat semak lapan jam, 12 jam enggau 4 hari ke sekula, nya alai kami mesti nentuka sida enda suntuk pemakai,” ku iya.

Nangkan nya, Lucy mega bebendar minta bantu awakka SMK Bario tau bisi telefon kunsi enggau tiang arus penyambung.

Nya ngujungka ba taun 2001, SMk Bario mujur diberi sebuah telefon kunsi enggau tiang arus penyambung sereta servis internet ngambika ulih bekaul enggau menua luar.

Ku Lucy, nyadi prinsipal ba SMK Bario nyadi kenang pemadu manis iya laban mujur mantu nembiak bansa diri empu.

Lucy Bulan midang kena 7 Mei tu tadi ba Sepital Miri ketegal penyakit riman lebuh umur iya manggai 68 taun.

Lucy kala nyadi prinsipal ba SMK Bario.

Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak