Mayuh kelas main asal tejanggal

SARATOK: Mayuh aktiviti udah dilanggur enda ulih dipejalai ketegal pengerekai Covid-19 di menua tu.

Sekretari Kelab Main Asal Gerempung Bansa Dayak Sarawak (SDNU) Saratok, Sita Inka madahka agi tubah kelas main asal apin ulih dipejalai sekumbang menua dituntung penusah lebih setaun ke udah.

Ku iya, sinu meda bala ke udah rejister enggau gagit masuk kelas main asal baka belajar kuntau enggau ngajat nyau jelungan diparit penusah dunya nya.

“Aku ngarika bala raban SDNU Saratok, SIDS Saratok enggau Kelab Main Asal Saratok deka minta ampun laban mayuh aktiviti ti udah dilanggur enda ulih dipejalai.

“Kitai sama nemu, pengawa tejanggal ketegal Covid-19 ti majak ngerekai lalu kitai sama bejagaka pengelikun enggau pengerai diri empu nitihka lalau ari opis pengerai,” ku iya lebuh dirandau Suara Sarawak tadi.

“Ngena awak tu, aku deka ngenataika pengelengau ati beserimbai Gawai Dayak baka taun tu kelebih agi ngagai anak aku, Kriztina Kantan sebilik di Kuching.

“Enggau tu meha aku besampi ngajihka Gawai taun tu ulih ngerapitka agi kaul diri sebilik, kaban belayan sereta pangan kitai enggau bekenaka teknologi.

“Jaga pengerai sereta pengelikun diri empu lalu titihka mih SOP ti udah diletak perintah awakka penyakit Covid-19 tu jampat pukas lalu kitai ulih bejalaika pengawa enggau aktiviti baka selama,” ku Sita nibarka jaku lalau.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak