Misha keran ngangkatka pesaka Dayak ngambi dikelala dunya

KUCHING: Produser Filem, Misha Minut Panggau merambu ngaga filem artistik bekaul enggau jerita tuai sereta adat lama ke nyau majak lenyau.

Iya ngarapka udah tu bisi serikat besai deka meri agih belanja dikena ngaga mayuh agi cherita Dayak.

“Tuju aku keran amat ngaga filem artistik bekaul enggau jerita tuai sereta adat lama laban deka ngangkatka pesaka asal kitai Dayak.

“Tu mih peluang kitai ngangkatka pengeraja asal kitai Dayak lebuh Filem Belaban Hidup diaku enggau nerima mayuh anugerah ba tikas dunya.

“Enti enda, pengeraja kitai Dayak tu deka lenyau selenyau diserunyut arus pemansang dunya kemaya hari.

BUJANG BERANI… Pelakun Pablo Amirul (mua) melakun nyadi Gadang dalam Filem Belaban Hidup: Infeksi Zombie lebuh rumah panjai sida diserang zombie.

“Nya kebuah, aku keran amat deka mantaika penyelai, pengelebih enggau pengelain dikembuan raban bansa Dayak laban kitai ba Borneo tu endang kaya enggau budaya sereta adat lama,” terang Misha enggau temegah.

Nambahka nya ku iya, budaya enggau adat lama ditampung ari aki ini kitai kelia patut dipandang ngambi mensia ba serata dunya ngelala enggau meretika gaya pendiau enggau pengidup bansa kitai.

Nya alai, pemujur Filem Belaban Hidup udah ngerandang jalai ngagai kitai majuka agi singkang ba industri filem menua, bansa kitai nyau dikelala komuniti dunya.

“Aku empu endang bisi juluk besai, mai budaya enggau identiti Dayak ngambi nyadi siti ‘elemen’ dikerinduka mensia mayuh lalu nyadika teladan bansa bukai.

“Chukup gaga enggau temegah ati lebuh Filem Belaban Hidup: Infeksi Zombie deka dipandang ba menua luar pengelama tiga hari,” ku iya enggau tuchum manis.

BUDAYA KITAI… Misha enggau Ray Lee begambar ungkup kenang enggau raban ari Kelab Gagung Sarawak ke mega belakun dalam filem tu.

Ke penerang, Filem Belaban Hidup nya deka dipandang ba Los Angeles Asian World Film Festival berengkah ari 21 ngagai 23 Mei tu, jam Malaysia.

“Lebuh ke nerima email ari pengari Asian World Film Festival nya, naka pengaga dalam ati aku din, nyau asai deka manjung empa pengaga.

“Kebuah pia laban Filem Belaban Hidup tu terubah iya feature filem digaga aku empu, ari penemu anak Dayak ti enda dikelala orang.

“Tu mih filem Dayak keterubah dipandang ba menua luar, dipeda orang menua tasik din.

“Pelaba aku, ukai semina aku aja ti gaga enggau temegah lebuh Filem Belaban Hidup tu bulih mayuh anugerah tikas dunya tang semua orang Dayak bela ngasaika iya.

“Semua pengelelak enggau pengiruh kami ngelama tu udah tebalas. Arapka bala bukai bela temegah ati enggau seruran meri sukung ngagai pengawa kami udah tu,” ku iya enggau ati gaga.

Filem Dayak keterubah bisi mandangka pelakun bekenaka gagung, pekayan bujang berani.

Sida ke melakun ngena gagung dalam filem nya datai ari raban Kelab Gagung Sarawak betubuh semilan iku iya nya Binar Berayun, Leighton Manjah, Noel Tony, Kembuan Thomas, Jabang Juntan, Fabian Masing, Martin Bilun, Bos Tupa enggau Dennis Tan.

“Aku mega ngarapka mensia mayuh kelebih agi kitai Dayak bela nyukung filem keterubah Dayak tu lalu bebai meda filem tu ba panggung wayang.

“Sukung kita nya beguna amat ngambi udah tu, aku ransing agi ngaga filem bukai bekaul enggau pendiau pengidup kitai Dayak.

“Nyau limpang mimit ari utai ke udah ditusi tadi au, pengudah pemujur Filem Belaban Hidup nya, aku bisi ngadu siti telemovie dikumbai Kaban.

“Enti nitih, kami deka ngaduka telemovie nya ba bulan April tu tadi tang tejanggal ketegal pandemik ke balat ngerekai ba menua tu.

“Enti nadai penanggul kami deka ngaduka telemovie enggau ‘shooting’ ujung bulan Mei tub a Kuching.

“Arapka semua kita nyukung telemovie baru tu, pesan aku jaga pengerai enggau pengelikun kelebih agi maya pandemik Covid-19 tu,” ku Misha nyimpul randau enggau Suara Sarawak.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak