Nujah Bukit Santubong

Rindu nyerungkai palai babas tuai, ngicha kadiri bisi tetemu ke jerita nyata bekau pejalai alai tuai lama kitai kelia.

Taja pia ku John Adam Gilbert Anyai, anang ngumbai kami enda ngumbai diri enda mai ati nangi.

Enti salah pematah kena tujah enda manah mimpi, tau bulih penusah ngasuh tasah lalu bebadi.

Ukai mindah nusoi jerita ka ngiga diri jelai nama tampak rita, tang ngambi semua kitai bela ampit nemu ni iya ke nyata kelimpah ari utai ke ditusui orang tampung menampung enda nyengenda.

Iya ke udah ku John, bedau tetemuka antu tang kala bala keda ke bidik lansik meda kenaya enggau ninga munyi bala petara.

PUH BEJALAI MATAU MENUA… John mujur ngenataika diri ba tuchung Bukit Santubong.

Anang ngumbai kampung puang nadai ensung nyumbuh bujang nadai orang, tak iya magang nya dia ke enda dipeda ngena mata cheremin penerang.

Abis bukit dikelanit, abis tebiang endur ngerandang, abis wong alai manjung, abis sungai disemerai, nyentuk ke lubang remaong ke kala didinga negung lalu digusung.

Tang ari sampi piring nyadi, bisi ga bala petara ninga lalu nyaga kami sebala.

Lalu ngarapka dudi hari ila kita ke enda enggau nya besampika pengelikun kami, ngambi kami nemu pulai, gerai nyamai bisi mai berita ti menyana ke temu bala.

Nya alai serak tu, John mai kitai ngenang pejalai tudah diri lebuh niki enggau nujah siti bukit ti tebilang nama di Sarawak dikumbai Bukit Santubong.

MAR DITUJAH… Urat kayu nyadika tangga lebuh nanjak bukit ke renjan.

NYIDI JALAI LAMA

Tumu dani pagi nya, lalu meli utai ke bekal dibai nujah niki Bukit Santubong.

Mupuk ari Kuching urung pukul 7.15 pagi lalu datai ba Kampung Santubong dalam pukul 8.00 pagi.

Lama beratika dini tunga jalai ke kala ditujah aku kelia taun 1990 laban gaya menua dia udah balat bendar berubah laban pemansang.

Nyau manggai pukul 8.30 pagi baru aku tetemuka jalai aku nya kelia, ti kala ditengah aku lebuh aku pulai keterubah aku ti nujah bukit nya kadiri ba bulan Julai, 1990.

Udah aku tetemuka jalai nya kelia, dia aku lalu nguluka aya Edmund Stanley Jugol enggau Nicholas Bawin niki nengah jalai nya maya nya suba.

Lebuh nya suba aku agi gawa ba Indu Opis Polis Kontinjen Sabah tang bisi di Kuching lalu enggau orang Kus Jurulatih Jasmani ba Palan Latih Polis, Bukit Siol, Kuching sepengelama sebulan.

Gaya jalai kitai niki Bukit Santubong rambau nya suba chukup pedis laban nadai meruan jalai digaga orang.

Ba tebing batu ke tinggi mega semina tali sengapa ke dikena niki nya, lalu suah agi kami ke niki bepaut ba urat kayu aja.

Jalai mega repa sereta kamah laban uras pemakai ti dibuai orang ke niki kia enda temu tungga ba sengapa alai.

JALAI UDAH MERUAN

NGUNDAN MAYUH JERITA NYELAI… Bukit Santubong gah bediri ditimpai ari jauh.

Lebuh aku ti niki kadiri ke sekali tu, dia aku meda jalai kitai niki Bukit Santubong nya udah diadu naka pemanah sereta beresi, nadai agi meda uras baka suba.

Mayuh tali disedia nyadi endur kitai bepaut ba alai ti renjan. Lalu bisi mega bangku enggau mija digaga endur nat kadiri lebuh maya ngetu.

Ba tebing ti balat renjan mega bisi diengkah ke orang tangga aluminium dikena kitai niki lalu bisi dua iti langkau ti tau endur kitai ngenduh kadiri enti sema hari ujan.

Mayuh mega gulung paip ai plastik udah diangkut sida ka dikena narit ai ke atas bukit nya.

Tang enti ba sepemanjai jalai kitai niki Bukit Kinabalu, sida bisi engkah tong plastik ke muat 500 litre ai ngambi bisi endur ngambi ai irup tauka ke guna bukai.

MALIN PEJALAI… Penurun tebiang dilekatka pat nama ngambi pengusung enda limpang ke bukai.

Lalu sida dia nyamai laban 11,000 kaki ba Gunting Legadan Hut endang bisi mata ai ti enda kala langkang nyadi ke endur sida ngambi ai kena ngisi tong nya.

Tang ba Bukit Santubong ditu ka beleman mimit, laban nangi enggaika ai enda ulih dipum ke atas kin, ngagai tuchung peninggi 3060 meter.

Sekumbang ke nengah jalai ke atas kin, dia aku meda jalai ke suba enti dibanding enggau ke diatu udah jauh bendar berubah.

Suba nadai tentu berupai mayuh tebing bukit nya ke renjan ditiki, tang diatu enti enda salah ingat aku asai ke lebih ari sepuluh iti endur ke diengkah sida tangga aluminium nya.

Ba rantu jalai aku bisi meda bekau babi babas nyungkur tanah dia, lalu bisi mega meda kera enggau tupai ba puchuk kayu lebuh maya aku mulai kadiri.

NADAI NEMU LANGKANG… John benasip ulih tetemuka Telaga Kumang suah ti suah disebut orang ba tuchung Bukit Santubong.

MAYUH CHERITA NYELAI

Aku bejalai niki kia begadai gadai laban nemu jalai dia sigi tak pama diri ditujah.

Maya ti niki nya aku nadai meda orang bukai sama enggau niki, nyau ka datai ba peniki bukit ti ketiga ngagai tuchung aku bisi ninga munyi orang bejaku tang enda nyengala sereta enda dipeda laban lindung daun kayu.

Aku sigi enda kiruh enti sema bisi orang bukai ke sama enggau niki kia. Laban enggai mayuh runding nangika pejalai diri empu tau puntan jelungan.

Lalu aku mega sigi nemu Bukit Santubong tu endang agi latung tang enda asai ke nujah Wong Merah enggau Bukit Tatai Kelingkang.

IBAN BEGAWAI

MENUA AGI LATUNG… Batu besai enggau pun kayu bebesai dipeda sekumbang niki ngagai tuchung bukit.

Pejalai kitai niki Bukit Santubong tu iya nya ngerenchah dua iti anak bukit ke baruh agi, udah nya baru kitai ngerenchah bukit siti ke baruh mimit ari tuchung Bukit Santubong nya.

Kala Melayu siku ari Kampung Gersik, Kuching bejerita ngagai aku, laban sida niang apai iya kelia ke berikan lalu selalu ngetu ngenduh ba Pantai Santubong nganti maya sida ke tau muat pukat.

Dalam setaun endang mesti bisi sekali utai tu sigi bisi nyadi tang nitihka pemidik lansik sapa ke ulih meda.

Utai ke dipeda bala laut ke berikan nya kelia, iya nya seraban kitai Iban bengepan baka ke mansang ngayau tauka mansang ngabang, lalu sida nya nepan perau pengayau kira empat ke lima buah enda temu ari ni penatai.

Sangkai dia, sida lalu niki ngagai Bukit Santubong lalu bisi didinga sida Melayu, sida nya begawai di atas din.

Laban ba Bukit Santubong nya endang bisi endur menua orang Panggau ku sida, ke lalu enda berani ditujah sida ngapa nyentuk ke diatu.

ORANG PANGGAU

Lalu bisi mega jerita tusui kaban aku ari Pantu ngenang niang apai iya kelia ti nyadi paderi kala dibai Rajah James Brooke belabuh ke kapal ngimbai Bukit Santubong.

Nyadi semua sida ke bukai diasuh Rajah James Brooke nganti ba tebing tasik nya, lalu iya niki Bukit Santubong nya kadiri lalu bemalam diatas din. Reti nya Rajah James Brooke tu kelia kala nampuk ba Bukit Santubong.

Kala sida meda iya nurun ari bukit nya mai tungkus asi ke agi angat. Lalu bisi sida ngumbai Rajah James Brooke nya ditunang Kumang, nyangka nya kebuah Rajah lalu enda bebini sampai ke iya parai.

Lalu bisi mega orang ngenang Balang Balai Nyabung kala nusoi diri bemimpi niki rumah orang Panggau tiga kali.

Tang setiap kali iya niki, dia iya meda Rajah James Brooke sigi dulu belama ari iya datai dia.

Kala mega kitai Iban ke benama Bandar ti nyadi jaga astana Rajah James Brooke nusui diri dibai iya pulai ke England.

Datai din iya lalu diasuh Rajah James Brooke masu gari ke ai, benung iya ke bebasu nya dia iya meda kitai Iban empat iku merau bengepan.

Sida nya ngetu lalu ngasuh iya madah ngagai Rajah James Brooke sida ke datai nya ka ngambi Rajah ngasuh datai ngabang ke Kapit.

Ninga jaku pesan nya Rajah lalu mai Bandar nya enggau iya ngabang nitihka jaku pesan dibai Iban empat iku nya.

Ngabang meh seduai nya kin, orang mayuh enda meda seduai, tang seduai endang begulai enggau orang sama begawai dia ke alai jerita tu ditusui Lemambang Lanting ari Sungai Pati, Serian.

Lalu bisi mega jerita tusui orang lebuh maya keterubah Queen Elizabeth I, datai ke Sarawak taun 70’an, dia laki Queen nya bisi niki Bukit Santubong.

Pulai iya ari bukit nyin orang bukai ngenung meda mulut iya agi mirah bekau enggau orang Panggau makai pinang ba bukit din.

Nyangka nya kebuah jerita bala Ribai tu sigi bisi kena kenang ba leka kana jerita tuai kitai Iban kelia.

TELAGA KUMANG

Nyadi limpang ngagai jerita aku ke niki Bukit Santubong nya, semakin lama nyau ka datai ba tuchung, orang nya tadi lalu nadai temu tungga sereta nadai didinga aku bemunyi agi.

Lebuh aku datai ba tuchung din ba peninggi 3060 meter, aku berasai tekenyit ati laban sigi nadai meda orang bukai udah datai dia dulu ari aku.

Endang semina kadiri aku aja dia, enda ga aku berasai takut tauka bisi nyeregu bulu pegu laban sigi belabaka nya tadi nyangka bala petara ti nguan tuchung Bukit Santubong nya.

Aku lalu ngelengkaka kantung sandik aku ba langkau ke endur orang ngetu dia, lalu terus ngiga Telaga Kumang ke selalu disebut orang bisi ba tuchung bukit nya.

Udah aku tetemu ke telaga nya, dia aku lalu mandi bepanjah ngena gayung ke endang bisi disedia ke orang dia.

Keterubah aku bepanjah ai nya berasai chelap tang enda ga nya ngasuh aku bedigak. Nyau pemuas aku ke bepanjah tubuh aku nyau berasai lantang laban ti kelalu ikak.

Tang utai ke nyelai maya aku mandi nya, dia bisi seraban burung lelayang datai naka pemayuh terebai ba atas aku ke mandi nya.

Embun tebal pan lalu datai ngujungka nya nyau ngasuh utai dia nyau rapas dipeda kira bisi sepengelama sepuloh minit, menua nyau bebali petang laban kabus embun tebal.

Bau utai nyelai nadai aku ensium, munyi utai nyelai pan nadai. Aku lalu ngadu kadiri belabuh makai tengah hari.

Maya nya jam nyau pukul 12.30 tengah hari. Laban ngerumban ka mulai kadiri enggaika hari ujan lalu jalai pan lichin.

Sepemanjai aku mulai kadiri, aku nadai apa nama. Lalu pejalai aku pan begadai gadai nangi enggai kadiri tau bulih penusah lalu nadai orang ulih mantu.

Nyadi naka nya kenang aku ngagai bala kita, enti jerita aku nya bisi salah tampung, aku minta ampun lalu besampi ke semua kitai gerai nyamai belama sereta mujur ngereja semua pengawa ke dudi hari.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak