Pejalai Francisca ke Florida nyadi teladan

KUCHING: Chukup temegah lebuh anak Sarawak, Francisca Luhong James udah bebendar ngarika Malaysia ba Pekit Miss Universe 2020 taja enda mujur masuk Top 21, ku Direktor Filem, Ray Lee.

Ngelansa pasal pekit nya, iya ngarapka utai ke nyadi ba Francisca tu ulih nyadi teladan ngagai bala pemekit bukai ngambi enda betandu dudi hari.

“Kemari, aku bisi meda pekit Miss Universe 2020 ti dipanchar terus ari menua Florida nengah streaming online.

“Aku chukup temegah meda kumang kitai, Francisca udah naka ulih mekit bala bukai baka chara iya bejalai ayun lundai, jelan indu kitai menua.

“Iya ukai semina udah ngemegahka nama menua aja tang mai identiti bansa Malaysia ba mata dunya,” ku iya lebuh dirandau Suara Sarawak.

Ray Lee madah, ba renggat terubah pekit nya, Francisca udah mantaika penau diri lalu iya berasai temegah ulih meda indu Dayak bepekit ba panggau dunya.

“Kami sebilik mega baka bala bukai, bela besampi sereta arapka iya menang Miss Universe 2020 nya.

“Taja pia, aku bisi asa lebuh ba renggat Nasional Costume Night mantaika costume Kampungku nyau meri penanggul ngagai tudah Francisca.

“Iya dipeda baka suntuk awak endur nukar baju, nambit pintu sereta ‘ngirit’ costume nya.

“Lebuh pemekit ari Laos mulaika kediri ke belakang, costume Kampungku nya jauh tinggal sereta nyau deka ngelantak hos ti duduk ba panggau.

“Tambah mega lebuh ba tengah panggau, custome nya singit ngujungka bala akim tusah deka meri mark ngagai Francisca,” ku sagam penemu iya.

Kadang, lebuh kitai jauh ba menua orang dia mayuh pekara ti enda ulih diseliah enggau nadai disadang.

Nya alai manah agi enti kitai nyikap diri tauka sedia dulu ngambi bisi runding mutarka sebarang penanggul ti tau nyadi.

“Ba aku empu, chara iya bejalai udah chukup manah enggau kreatif tang engka utai ke nyadi ba panggau enda baka diperambu sebedau tu.

“Costume nya dipeda nyau ‘nating’ tudah Francisca ngujungka tudah ‘ribat’ endar, mua iya mega tampak amat irauka costume nya enda bejalai,” ku iya nambah baru.

Ari penerang ditemu Ray Lee, Francisca bekejang kediri ngagai Florida lalu pekara baka nya ngasuh kitai sinu lebuh betatika tudah kediri-diri di menua orang.

Nama kebuah ejensi menua enda melanja iya ngambi bulih belanja ke besai agi mai kru iya empu kin?

“Francisca ukai semina ngemegah nama Malaysia tang ngarika 32 juta iku rayat Malaysia din, nama Malaysia disebut bepuluh kali din,” ku Ray Lee ngenang pasal pejalai Francisca ba pekit nya.

Nambahka nya ku iya ti mega siku pengeluar, Direktor Filem enggau pengatur konsert ti ngembuan peneleba 15 taun madah, pekara ke nyadi ngagai Francisca ulih diseliah enti sida ngadu rehearsal ba atas panggau ke endur sida bepekit.

Kebuah pia ku Ray Lee, ngambi pemekit ulih nemu pengasai ke bendar atas panggau lalu ukai diau jenuh dalam bilik hotel.

“Kedua nya, orang ti nyaup iya nulak costume nya mesti nyiri orang ti sama maya rehearsal enggau live, lalu Francisca mesti bisi kru kediri nyaup iya maya bepekit,” ku iya nambahka anak penemu.

Ba lansa sama, Ray Lee madahka anak Sarawak ngembuan pengelebih enggau penau kediri empu ngangkatka diri datai ba tikas entarabansa.

Ray Lee mega madahka iya chukup temegah enggau pemujur anak Sarawak ti udah ngemegah nama Malaysia kelebih agi Sarawak ba mata dunya.

“Berapa bulan ke udah, mayuh anak Sarawak udah nempa nama ba tikas dunya ari Produser Filem Belaban Hidup, Misha Minut Panggau ke nerima mayuh anugerah, dientudi Pandelela Rinong Pamg bulih midul emas.

“Pia mega, atlit paralimpik Bonnie Bunyau ngagai kumang bajik Francisca Luhong James udah ngarika Malaysia bepekit Miss Universe 2020.

“Kitai berasai chukup temegah laban nama Malaysia udah pegari nama ba mata dunya lalu semua sida tu ngembuan pengelebih kediri empu,” ku Ray Lee nerang.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak