PRN patut ditangguh ke pemaik rayat

KUCHING: Pengawa madamka DUN Sarawak deka ditetapka ba siti haribulan ke diasaika Yang di-Pertuan Agong Sultan Abdullah Ri’ayatuddin Al-Mustafa Billah Shah engkeman pengudah berandau enggau Tuai Pemegai Menua (TYT) Sarawak, Tun Pehin Seri Abdul Taib Mahmud.

Sekretari Besai Gempung Parti Sarawak (GPS) Datuk Alexander Nanti Linggi madah, Kepala Menteri Datuk Patinggi Abang Johari Tun Openg deka betemu enggau Yang di-Pertuan Agong bekaul enggau pekara tu.

“Kitai andal enggau pemintar Yang di-Pertuan Agong Yang Di-Pertua Negeri ba pekara tu.

“Maya darurat pengerai ketegal penyadi pandemik Covid-19 tu pengidup rayat patut dikemerat,” ku iya.

Kaban Parlimen Kapit nya madah munyi nya ba aum pemberita ba Indu Opis Pari Pesaka Bumiputera Bersatu (PBB) di Jalai Bako ditu kemari.

Ku iya, timpuh Dun Sarawak deka abis kena 6 June tu.

“Enti ngelama tu Dun enti nitih udah dipadam ngambika rayat ulih milih perintah ke baru nitih chara demokrasi nengah pengawa bepilih besai.

“Tang, menua diatu agi dibaruh Darurat Pengerai pandemik Covid-19 nyentuk 1 Ogos 2021,” ku iya.

Nya alai, Kepala Menteri deka betemu enggau TYT ngambi madahka Kunstitusyen Sarawak timpuh Dun abis kena 6 Jun 2021 iya nya genap lima taun ari 7 Jun 2016 haribulan aum keterubah Dun pengudah Pengawa Bepilih Besai Sarawak 2016.

Kenu ku iya, nya alai Darurat Pengerai pandemik Covid-19 dipejalai nyentuk 1 Ogos 2021 lalu pengawa madamka Dun deka ditentuka ba siti haribulan ke diasai Agong engkeman pengudah iya berandau enggau TYT.

“Ba penemu GPS, pengawa bepilih besai Sarawak patut ditangguh laban penyampau kes Covid-19 agi raya.

“Pengawa bepilih besai Sarawak ukai batang pekara ke berat tang nyawa rayat patut dikemerat,” ku iya.

Sama bisi datai Sapit Sekretari Besai GPS Datuk Ibrahim Baki.

Suara Sarawak