Sitak Lubok Antu nerima agih belanja RM382 juta

LUBOK ANTU: Perintah Besai udah ngemendarka agih belanja sepenyampau RM382 juta ungkup sitak Parlimen Lubok Antu.

Kaban Parlimen Lubok Antu,Jugah Muyang madahka agih belanja nya udah dikemendarka Menteri Besai Tan Sri Muhyiddin Yassin ungkup guna sitak iya ngatur projek pemansang infrastruktur.

Ku iya, agih nya mega nyengkaum agih Projek Ngaga Baru Jalai Ulu Batang Ai ti dikemendarka nengah Langgur Pemansang Malaysia Lumpar Ke-11 ti beungkus RM187 juta.

“Enggau Projek Masang Paip Ai Beresi ti benung dipejalai jam diatu ti begunaka ungkus sepenyampau urung RM117 juta.

“Projek bukai iya nya nyeleti Jalai Ulu Skrang beungkus RM28 juta, perambu projek ngaga baru opis pengajar, bilik kelas enggau buding ungkup urung 200 iku nembiak bemalam ba SMK Engkilili beungkus RM22 juta enggau projek ngaga Klinik Lubok Antu beungkus RM28 juta,”ku iya.

Pekara tu ditukuka Jugah empu pengudah betemu enggau Tan Sri Muhyiddin ba Opis Menteri Besai kena 20 Mei tu tadi.

Nambah nya, meri terima kasih besai ngagai Perintah Perikatan Nasional (PN) betuaika Menteri Besai Tan Sri Muhyiddin laban seruran beratika penusah enggau penanggul ditapi peranak menua pesisir lebih agi ba sitak Lubok Antu ti agi balat jauh tinggal ari sukut pemansang infrastruktur dibanding enggau ke bukai.

“Ngarapka projek pemansang infrastruktur kebakatu ulih meri penyenang laban tu mih entara siti ari tuju perintah menua ngelama ti deka meda genap ikas rayat bela ngasaika pemansang lebih ari rayat ba menua pesisir,”ku iya.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak