Tanjung Manis, Tatau mali mirah

KUCHING: Pelilih Menua Tanjung Manis enggau Tatau bebali ari status oren ngagai mirah pengudah ngerikodka 46 enggau 58 kes berampit.

Komiti Penyangga Penusah Nengeri (JPBN) dalam siti penerang media madahka, Pelilih Menua Beluru enggau Tebedu pulai bebali ari status mirah ngagai oren laban semina ngerikodka 25 enggau 38 kes berampit dalam timpuh 14 hari.

Nya ngujungka penyampau pelilih menua ba status mirah agi mengkang 24 buah.

Naka diatu, pelilih menua ba status oren bisi tiga buah, pelilih menua ba status kuning bisi 10 buah enggau pelilih menua ba status gadung bisi dua buah.

Berebak enggau nya, siti kluster baru ayan kemari dikumbai Kluster Jalan Dato Permaisuri, Miri berindik ari siti program makai begempuru kena 1 Mei.

Taja pia, penerang nya madahka dua kluster ti dikumbai Kluster Jalan Kapitan, Marudi enggau Kluster Pujut Satu, Miri ditukuka punas pengudah nadai ngerikodka kes baru positif Covid-19 dalam timpuh 28 hari.

Diatu, Sarawak ngembuan 84 kluster agi ngerekai ketegal Covid-19.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak