Umbas ngerembaika berita enda manah pasal Teresa

KUCHING: Sapit Presiden Gerempung Anak Borneo Semenanjung (PABS) Gangging @ Ling Sanggau ngelalau raban net (penguna media rama) tauka mensia mayuh badu nyadung berita pasal Teresa Santa Angil, siku indai tunggal ba media rama.

Ku iya, pekara nya meri empas besai ngagai Teresa laban indu tu bebendar madahka iya nadai nipu.

“Kita ba luar patut nemu, indu tu bekenanas nupi lima iku anak iya, berita ti ayan ba meda rama nya meri pangka besai ngagai pengidup iya enggau bala anak tudah.

“Anang arapka berita ti ayan laban kami empu udah bulih penerang ari Teresa empu sereta agi mansik pekara tu,” ku iya lebuh ditanya Suara Sarawak, kemari.

Ku iya, facebook Teresa ti ayan ba media rama nya kebendar Facebook lama ke nadai diguna iya agi.

“Gambar siku lelaki ti dikumbai laki Teresa kebendar siku orang ti datai mantu sida sebilik, ukai laki iya.

“Bisi mega gambar ti ngayanka anak Teresa mega telefon binching, tiga iti telefon nya dibantu ari tiga iku pemantu ti kasihka anak Teresa dikena anak tudah belajar ari rumah,” ku iya.

Lebuh ditanya, nama pengawa ti deka digaga PABS nangkan tu, Ling madahka sida deka nyerahka penanggul ti ditapi Teresa ngagai Opis Pengintu Pengelantang (JKM) ungkup pansik bukai.

“Aku tetap nyukung iya, laban aku meda pendiau pengidup iya ti tusah ngiudpka diri dikena nupi lima iku anak.

“Nya alai, aku meransang ngambika berita enda menuku ayan ba media rama patut dipadam laban ulih meri pangka runding ngagai Teresa sebilik,” ku iya.

Cherita Teresa viral pengudah kisah iya ayan ba facebook PABS apin lama, tang udah nya sekeda penguna media rama nawa Teresa tu siku penipu.

Naka berita tu ditulis, Teresa madahka iya udah ngaga ripot polis ungkup pansik bukai.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak