350, 000 vaksin Sinovac udah datai di Kuching

KUCHING: Sepenyampau 350,000 vaksin Sinovac datai pagi kemari deka dikena ba Program Betuchuk Vaksin Covid-19 Nasional (PICK) ba Kuching, minggu tu.

Menteri Kaunsil Kandang Menua enggau Pengawa Berumah, Datuk Seri Dr Sim Kui Hian madah, vaksin nya mega dianjung terus ari Kuala Lumpur ngagai Miri kena 17 June tu tadi ngambi dikena ba Miri enggau Bintulu.

“Taja Sarawak mimit aja vaksin tang ulih ditambah enggau jampat ba timpuh seminggu kepenudi enggau pemisi vaksin ba menua tu,” ku iya meri penerang di Facebook, ditu kemari.

Nambahka nya, iya meri terima kasih ngagai Menteri Sains, Teknologi enggau Inovasyen (Mosti) ke mega Menteri Kordinator Program Betuchuk Vaksin Covid-19, Khairy Jamaluddin enggau Menteri Pengerai Datuk Seri Dr. Adham Baba laban udah ngamatka semaya meri vaksin tu.

Ku iya, Sarawak udah ngamatka semaya lebuh penyampau program betuchuk vaksin nambah ninting hari.
“Staf perubat enggau raban terabai komuniti ti bebendar gawa pengelama 18 jam tujuh hari seminggu nya endang suah dikereja sida tang sida mesti bejejaga lebuh bejalaika pangku pengawa.

“Nya kebuah, aku ngarapka kita meretika tanggung pengawa sida lalu siru ngenang pengelelak raban terabai komuniti tu.

“Beri mih jaku peransang lalu beri mih kerejasama ngagai sida lebuh bejalaika pangku pengawa,” ku Kui Hian.
Ku iya, kerejasama rayat Sarawak beguna amat nentuka pengawa betuchuk vaksin lanchar dipejalai lebuh kitai benung beperang enggau pandemik Covid-19 tu.

“Anang datai kelalu tumu ari 30 minit baka semaya dalam MySejahtera kita.

“Pia mega, semampai meresa aplikasyen MySejahtera ngambi kita nemu semaya diri.

“Nya alai, kita mesti nitihka Atur Pengawa Standard (SOP) taja udah betuchuk dua dos vaksin.

“London enggau New York diatu udah pulai baka selama pengudah nyapai imuniti beraban (70 peratus udah dituchuk vaksin) lalu semua orang mesti bejalaika tanggung pengawa diri ngambi kitai nyapai imuniti beraban ba bulan Ogos,” terang iya baru.

Iya madahka program betuchuk vaksin Covid-19 nya program pemadu besai kala dipejalai di Sarawak.
“Rayat Sarawak mesti besaup sereta seati ngambi kitai ulih ngelaban igi penyakit tu,” ku iya nyemetak madah.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak