37 nembiak nerima bantu tusu tepung ari USK Bintulu

SARATOK: Gerempung ukai perintah (NGO) Urusetia Saudara Kita (USK) Bagi Menua Bintulu udah tembu nyadung bantu tusu tepung ngagai urung 37 iku nembiak mit ti diau ba Projek Rumah Rayat (PPR) Bandaria Park enggau Sungai Plan di Bintulu tadi.

Chairman iya,Jamal Abdullah madahka bantu tusu tepung tu disadung dalam timpuh pengelama tiga hari berunggu ungkup nembiak mit beumur sebulan nyentuk enam bulan.

“Puji Tuhan,sekali agi USK udah mujur bekunsi jereki enggau bala anak kitai ba dua bengkah genturung pendiau tu.

“Inisiatif tu dipejalai pengudah USK mayuh nerima serebana ari apai indai nembiak ditu ti madahka diri berasai tusah ati ngerunding anak sida nyau deka pungkang bekal tusu tepung ketegal atur bepekul.

“Pengawa meri bantu tu diberi ngagai semua nembiak ti beumur sebulan ngagai enam bulan ti diau ba palan nya enggau enda ngira bansa sereta pengarap dipegai sida,”ku iya madah ngagai Suara Sarawak, tadi.

Nangkan ke nya, Jamal ke mega Chairman Gerempung Pemansang Nembiak Rebak Baru (PNRB) Pelilih Pakan enggau Julau madahka NGO sida deka bekerejasama enggau Serikat AJ Truly Spices ti bepalan di Bintulu bejalaika program mantu lalu meri insentif ngagai raban nembiak lepas SPM ari Pakan enggau Julau ti deka nampung pelajar sida ngagai Palan Pelajar Tinggi (IPT).

“Pengawa meri insentif ngagai nembiak ti nyulut ba pelajar sekula tu endang siti ari aktiviti gerempung ninting taun.

“Arapka juluk kami tu ulih dikemujur ungkup pemansang pelajar lebih agi nembiak ari Pakan enggau Julau,”ku iya.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak