49 peratus peranak Kabong udah rejister nerima vaksin

SARATOK: Sepenyampau 9,405 iku peranak Kabong udah rejister betuchuk vaksin naka 2 June 2021.

Sapit Menteri Pengeluar Kuasa enggau Pengeraja Asal, Datuk Ali Biju madahka 49 peratus ari 19,201 iku beumur 18 taun enggau tuai agi ti patut nerima vaksin udah rejister.

Ku iya, sida nya deka nerima vaksin ba Palan Betuchuk Vaksin (PPV) Dewan Balai Polis Kabong berengkah 14 June tu.

“Aku empu udah ngabas palan betuchuk vaksin lalu tepantup ati meda pengawa dipejalaika dia.

“Kitai ngarapka tagit nambahka pemayuh orang ulih dituchuk vaksin dalam sehari deka nambah laban endur tu strategik ungkup peranak Kabong empu,” ku iya.

Ali ke mega Kaban Parlimen Saratok mansutka jaku nya pengudah ngabas PPV Dewan Balai Polis Kabong ditu, pagi kemari.

Sama datai Tuai Balai Polis Kabong, Sarjan Lidam Unting, Pegawai Opis Pengerai Pelilih Saratok, Dr Syafiq Ameerul enggau Pegawai Pengatur Pengawa Pelilih Mit Roban, Michael Meling sereta bala bukai.

Iya madah, PPV nya dikena nambahka tiga buah PPV ke bisi diatu baka Dewan Sri Krian, Sepital Saratok enggau Klinik PMG Saratok.

“Nentuka pengelantang bala ke gawa enggau orang ti datai nerima vaksin ba palan tu, kami ba Palan Servis Komuniti Sitak Parlimen Saratok deka meri empat unit irkon enggau naka pengelengkas.

“Sekali agi aku minta kasih ngagai semua kitai di Kabong ditu anang enggai rejister nama betuchuk vaksin laban tu pulai pemaik enggau pengelikun kita empu,” ku Adun Krian madah baru.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak