Adun Ba’kelalan ensiban, rayat enda divaksin tegal nadai tingki

KUCHING: Adun Ba’Kelalan Baru Bian ensiban lebuh bisi peranak ba Long San ke nadai tingki (IC) datai ngelawa palan meri vaksin diasuh pulai.

Ku iya pekara tu chukup sinu laban mayuh peranak ari menua ulu nya udah datai ba palan meri vaksin.

“Aku nemu taja sida nadai ngembuan tingki, sida ada enggau diau ditu betaun-taun.

“Genap rayat tauka genturung pendiau bisi Tuai Genturung tauka Tuai Raban Bansa kediri, sida ulih ngenuku genap orang dalam komuniti sida nya endang ‘mensia’ ke ulih kena rampit Covid-19, taja nadai dokumentasi ba jari,” ku iya nengah sebengkah penerang, kemari.

Nya alai, Baru nyemetak madah Komiti Penyangga Penusah Nengeri (JPBN) patut ngeluarka gerah tauka SOP ke terang, kelimpah patut bisi pegawai ba palan meri vaksin dikena mutarka isu tu.

“Bala pegawa ke dianjung bejalaika pengawa meri vaksin mesti ditangkan pasal tuju pengawa sida.

“Tuju sida iya nya nyaga orang ke mudah kena rampit, lalu terabai komuniti tu patut mereti pasal pekara tu,” ku iya.

Iya madah penanggul ke sama deka nyadi ba sitak bukai nyema nadai penerang ke nyemetak ari JPBN sentang pekara tu, laban diatu raban vaksinasyen udah masuk ngagai sitak menua pesisir.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak