Aku nemu semina pemujur sekula ulih ngubah nasip

SARATOK : Juluk ati deka nyadi lutur nyadika peransang ngagai Beatriz Jelia Anak Edmund Uda lebuh napi Peresa Setipikit Pelajar Malaysia (SPM) 2020.

Bulih pemutus 8A udah chukup ngemantupka ati nembiak SMK Bukit Assek, Sibu nya pengudah pemuas betapi enggau bemacham penguji ti datai nuntung sekumbang napi SPM.

“Aku sigi enda nyangka laban aku ngasaika diri chukup pedis belajar ba rumah kediri sekumbang pengerekai Covid-19 di menua tu.

“Taja pia, aku tetap mejal dirik belajar laban aku nemu semina pemujur sekula aja ulih ngubah nasip siku-siku mensia.

“Aku mega semampai betanya ngagai bala pengajar senentang topik ti mar ba aku.

TERIMA KASIH APAI ENGGAU INDAI…Gambar kenang Beatriz begulai enggau apai indai iya lebuh dipilih nyadi nembiak nyulut 2019 ba sebengkah Hotel tebilang di Sibu.

“Bala kaban mega nyadi palan selalu endur aku betanya kelimpah ari nguji ngatur jam maya belajar enggau manah ba rumah ngambika enda tusut runding.

“Kelimpah, aku mega bisi ngambi belajar ba luar (tuisyen) dikena aku nambahka penemu maya belajar dalam kelas baka subjek Fizik enggau Matematik Tambahan,”ku iya.

“Chukup mayuh penguji datai lebuh maya belajar lalu iyaka pemadu diasai iya nya betapi enggau penanggul arus internet ti lubah taja diau ba mengeri.

“Penanggul baka tu kekadang meri pengelemi maya belajar tang enggau sukung ari apai sedua indai sereta menyadi aku ke bukai, semua nya ulih ditapi aku enggau mujur.

Lebuh ditanya nama kebuah deka nyadi lutur iya madahka tu berindik ari enda tan ati meda indai iya ngenatka pemedis ketegal bisi ngembuan penyakit tungkul sengayuh.

“Apai aku gawa nyadi juruteknik lalu pengeransing apai indai ti bekeradai begiga belanja dikena nupi kami semenyadi ngelama tu nyadika siti ari peransang kena aku nyapai pemujur ba peresa.

“Lalu kebuah ti enda tan ati meda tudah indai ti benung betapi enggau pemedis penyakit buah punggung mih ngasuh ati aku tekuing deka nyadi Lutor jemah,”ku iya ti mega madahka diri deka nampung pelajar ba Matrikulasi.

Ungkup penemu, Beatriz kala menggi gelar Nembiak Nyulut Pelajar Sains maya agi ba Pom 4 lalu kala nerima insentif ari Gerempung Bansa Dayak Sarawak (SDNU) Pampang Sibu ba sebengkah pengerami diatur gerempung nya taun 2019 suba.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak